Հայաստանի Օմբուդսմենը Չինարիի հրետակոծության փաստերով նոր զեկույց կուղարկի միջազգային կառույցներին

Մարդու իրավունքների պաշտպանի (ՄԻՊ) աշխատակազմը Հայաստանի Տավուշի մարզի Չինարի գյուղի բնակիչներից ու համայնքի ղեկավարից ադրբեջանական զինուժի կողմից գյուղը թիրախային հրետակոծման ենթարկելու մասին ահազանգեր է ստացել:

ՄԻՊ աշխատակազմից տեղեկացնում են, որ ըստ այդ ահազանգերի՝ ադրբեջանական կողմից արձակվել է շուրջ մեկ տասնյակ արկ, վնասվել են գյուղի բնակելի շինություններ:

«Չինարի գյուղից Մարդու իրավունքների պաշտպանի աշխատակազմ են փոխանցել հրետանակոծությունից հետո արված լուսանկարներ, որոնք վկայում են գյուղի տներից մեկին պատճառված վնասի մասին: Մեկ այլ դեպքում վնասվել է բնակելի տան շինության տանիքը, իսկ հրետանակոծության պահին տանը եղել են երեխաներ։

Մարդու իրավունքների պաշտպանին ուղղված ահազանգերից անմիջապես հետո արձանագրվել է ՀՀ պաշտպանության նախարարության պաշտոնական հայտարարությունն այն մասին, որ Չինարի բնակավայրի ուղղությամբ ադրբեջանական զինված ուժերն արձակել են 82 մմ տրամաչափի ականանետից 7 արկ, իսկ 120 մմ տրամաչափի ականանետից՝ 3 արկ։

Մարդու իրավունքների պաշտպանին ուղղված ահազանգերը, Հայաստանի պետական մարմինների պաշտոնական հայտարարությունները և սոցիալական մեդիայի հրապարակումները վկայում են, որ թիրախավորվել է Հայաստանի քաղաքացիական խաղաղ բնակավայրը, առկա է խաղաղ բնակիչներին, նրանց կյանքին ու առողջությանը իրական վտանգ, ինչպես նաև գույքին պատճառված վնաս»,-մանրամասնում են ՄԻՊ աշխատակազմից՝ նշելով, որ ամբողջական դիտարկում, տեղեկությունների և փաստերի անկախ հավաքագրում է իրականացվում, իսկ արձանագրումները սահմանված կարգով կամփոփվեն և նոր զեկույցով կուղարկվեն միջազգային կառույցներին:

Մարդու իրավունքների պաշտպանը խստորեն դատապարտելով հատկապես գլոբալ համաճարակի պայմաններում Հայաստանի քաղաքացիական բնակավայրի հրետանակոծումը՝ խաղաղ բնակչության, նրանց առողջության ու կյանքի, սեփականության թիրախավորմամբ՝ հիշեցնում է ՄԱԿ-ի գլխավոր քարտուղարի, կորոնավիրուսի վտանգով պայմանավորված, դեռևս մարտի 23-ին արված՝ զինված հակամարտությունները երկրագնդի բոլոր անկյուններում անհապաղ դադարեցնելու կոչի մասին: Նշյալ կոչին, հիշեցնենք, աջակցություն են հայտնել և՛ Հայաստանի Հանրապետությունը և՛ Արցախի Հանրապետությունը:

Հիշեցնենք՝ հուլիսի 12-ին՝ կեսօրին մոտ, Տավուշի հատվածում Ադրբեջանի զինծառայողները ՈւԱԶ-ով պետական սահմանը խախտելու, հայկական զինված ուժերի (ԶՈւ) սահմանային դիրքը գրավելու փորձ են կատարել: ՀՀ պաշտպանության նախարարության հաղորդմամբ՝ հայկական կողմի նախազգուշացումից հետո Ադրբեջանի զինծառայողները, թողնելով ՈՒԱԶ մակնիշի ավտոմեքենան, վերադարձել են իրենց դիրք: Նույն օրը, 13:45-ին, Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը, կիրառելով հրետանային կրակ, սակայն ճնշվել են հայկական կողմից և կորուստներ կրելով, հետ շպրտվել: Ավելի ուշ ադրբեջանական կողմը վերսկսել է հրետակոծել մեր նույն դիրքի ուղղությամբ 82 մմ ականանետից և տանկից:

Այսօր ևս Հայաստանի սահմանին իրավիճակը պարբերաբար սրվում է, հաղոդվեց, որ հակառակորդը արկեր է արձակել Չինարի բնակավայրի ուղղությամբ:

Ադրբեջանն արդեն հայտնել է իր 4 զինծառայողների զոհվելու, ևս առնվազն 4-ի վիրավորվելու մասին: Հայկական կողմից, ըստ պաշտոնական հաղորդագրությունների, զոհվածներ չկան, 3 զինծառայող և սահմանին ծառայություն իրականացնող 2 ոստիկան մարմնական թեթև վնասվածքներ են ստացել:

«Հենակետ» վերլուծական կենտրոնի ղեկավար, Արցախի Հանրապետության նախագահի անվտանգության հարցերով նախկին խորհրդական Տիգրան Աբրահամյանի դիտարկմամբ՝ «Չինարի բնակավայրի արկակոծությունը ստեղծված իրադրությանը նոր սրություն է հաղորդում»:

Պատրաստեց՝ Լիաննա Մարգարյանը