Նախագահը տեղյակ չէ Հայաստանի ու Ադրբեջանի միջև սահմանագծման գործընթացի հիմքում ընկած քարտեզներից, կարմիր գծերից․ «5165»-ի տպավորությունը՝ Սարգսյանի հետ հանդիպումից

Նախագահ Արմեն Սարգսյանի հետ ունեցած հանդիպման առնչությամբ հաղորդագրություն է տարածել «5165 շարժում»-ը։

Հիշեցվում է, որ նոյեմբերի 22-ին «5165 շարժման» անդամները և մի խումբ հայրենակիցներ դիմել էին ՀՀ Ազգային Ժողովին ու նախագահին՝ կոչ անելով գործադրել իրենց սահմանադրաիրավական լիազորություններն ու կարողությունները Հայաստանի Հանրապետության և Ադրբեջանի միջև սահմանագծման ու սահմանազատման վերաբերյալ փաստաթղթի բովանդակությունը հանրությանը ներկայացնելու հարցում:

Ի պատասխան ՀՀ նախագահին ուղղված գրավոր դիմումի՝ նոյեմբերի 30-ին, ահա, կայացել է «5165 շարժման» անդամներ Կարին Տոնոյանի և Մենուա Սողոմոնյանի հանդիպումը։

Հանդիպման ընթացքում նախագահին ուղղված մի շարք հարցադրումների և մտքերի փոխանակման արդյունքում, «5165 շարժման» անդամները, մասնավորապես, ստացել են հետևյալ տպավորությունները.

1. Հայաստանի Հանրապետության և Ադրբեջանի միջև սահմանագծման ու սահմանազատման գործընթացը սերտորեն կապված է Արցախյան հիմնախնդրի հետ, որին առնչվող որոշումների կայացման հարցում Նիկոլ Փաշինյանը ձևավորել է մենաշնորհ:

2. Նախագահ Արմեն Սարգսյանը տեղյակ չէ Հայաստանի Հանրապետության ու Ադրբեջանի միջև սահմանագծման ու սահմանազատման գործընթացի հիմքում ընկած քարտեզներից, սկզբունքներից, կարմիր գծերից:

3. ՀՀ նախագահըպետության արտաքին քաղաքական որոշումների կայացման, ձևավորման գործընթացների, արտաքին քաղաքականության համակարգման կամ իրականացման առումով փաստացի սահմանադրական լիազորություններ չունի: ՀՀ նախագահի սահմանադրաիրավական լիազորությունները վերաբերում են արդեն իսկ կնքված միջազգային պայմանագրերի՝ ՀՀ սահմանադրությանը համապատասխանության հարցերին:

4. Գործող իշխանություններին հայտնի է նախագահ Արմեն Սարգսյանի տեսլականներն ու տեսակետները Հայաստանի զարգացման ռազմավարական մոտեցումների, Արցախի հարցում ՀՀ քաղաքականության վերաբերյալ, որոնք սակայն, Շարժման անդամների ստացած տպավորությամբ, գործող իշխանությունների կողմից կա՛մ հաշվի չեն առնվում, կա՛մ չեն ըմբռնվում:

5. Ստեղծված ճգնաժամային իրավիճակից դուրս գալու հարցում խիստ կարևոր է իրականացնել սահմանադրական իրական փոփոխություններ՝ ապահովելով իշխանությունների թևերի միջև փոխզսպումների և հավասարակշռման գործուն մեխանիզմներ:

Շարժումը հայտարարում է՝ անկախ հանդիպման արդյունքներից՝ իրենք մնում ենք այն «կարծիքին, որ, ըստ էության, Նիկոլ Փաշինյանը երկրի կառավարումն իրականացնում է միանձնյա՝ առանց հաշվի նստելու իշխանական այլ մարմիների կարծիքի հետ, կայացնելով միակողմանի վտանգավոր որոշումներ համազգային կարևորության ու անվտանգային մեծ նշանակության հարցերում»։

«Այս ամենից ակնհայտ է դառնում, որ Հայաստանի համար ծանրագույն այս իրավիճակում ոչ ոք հնարավորություն չունի ազդելու որևէ գործընթացի վրա և կասեցնելու մեր երկրին սպառնացող վտանգավոր զարգացումները։ Փաստացի մի ամբողջ ժողովուրդ դատապարտված է կրել Նիկոլ Փաշինյանի անհեռատես, չհաշվարկված և ոչ կոմպետենտ կառավարման ծանր հետևանքները։ Այս ամենից հետևում է, որ ամբողջ հանրությանը Նիկոլ Փաշինյանի կառավարության հեռացման շուրջ համախմբելը օրվա հրամայականն է, այլապես կորուստները շատ ավելի մեծ են լինելու»,-ասված է «5165 շարժման» տարածած հաղորդագրությունում։

Հիշեցնենք՝ «5165 շարժման» անդամներընոյեմբերի 22-ին կազմակերպած հավաքի ավարտին պաշտոնական դիմում-նամակ էին փոխանցել նաև ՀՀ վարչապետին՝ պահանջելով հանրայնացնել Հայաստանի և Ադրբեջանի միջև սահմանազատման ու սահմանագծման այն փաստաթուղթը, որի մասին վկայակոչել էր հենց ինքը՝ Նիկոլ Փաշինյանը։

Վարչապետի աշխատակազմից, սակայն, ի պատասխան հայտնել են, որ «նշված բովանդակությամբ փաստաթուղթ գոյություն չունի»։