Ստեղծված իրավիճակի առնչությամբ Արցախի ԱԺ-ն 19:00-ին արտահերթ նիստ կհրավիրի

Արցախի Հանրապետության Սահմանադրության 114-րդ հոդվածին և «Ազգային ժողովի կանոնակարգ» օրենքի 37-րդ հոդվածին համապատասխան՝ այսօր՝ մարտի 10-ին, ժամը 19:00-ին, Արցախի Հանրապետության Ազգային ժողովը (ԱԺ) արտահերթ նիստ կհրավիրի՝ կապված ստեղծված իրավիճակի հետ։

Նշենք վերջին օրերին, ինչպես և երեկ օրվա ընթացքում և ամբողջ գիշեր Ադրբեջանի զինուժը, տարբեր տրամաչափի հրաձգային զինատեսակների, ինչպես նաև ականանետերի կիրառմամբ, պարբերաբար խախտել է հրադադարը։ ՀՀ պաշտպանության նախարարությունը (ՊՆ) հայտնել է, որ մասնավորապես, մարտի 9-ին, ժամը 14։00-14։30 ի սահմաններում ԱՀ Մարտունու շրջանի Խնուշինակ գյուղի հարակից տարածքի ուղղությամբ արձակվել է 60 մմ տրամաչափի ականանետի 2 հատ ական, իսկ ժամը 15։5-ից մինչև մարտի 10֊ի ժամը 05։40-ը ընկած ժամանակահատվածում հակառակորդը 15 անգամ 60 մմ. տրամաչափի ականանետ է կիրառել արևելյան ուղղությամբ՝ Խրամորթ գյուղի հարակից տարածքի վրա արձակելով ընդհանուր առմամբ 23 հատ ական։

Արցախի դատախազությունն ու ոստիկանությունը հայտնել են, որ այսօր առավոտյան Խրամորթի հատվածում ադրբեջանական կողմի կիրառած ականանետից իր տան բակում գյուղատնտեսական աշխատանքներ կատարելու ժամանակ մեջքի շրջանումբեկորային վիրավորում է ստացել է նույն համայնքի բնակիչ, 1971թ. ծնված Սուրեն Բաղրյանը:

ՀՀ մարդու իրավունքների պաշտպանը հայտնել է, որ Խրամորթ գյուղի ուղղությամբ երեկ օրվա ընթացքում ինտենսիվ կրակոցներն ուղեկցվել են բնակչության նկատմամբ հոգեբանական ճնշում գործադրելու հանցավոր գործողություններով, բնակչությանը՝ գյուղը լքելու մասին բարձրախոսով հայերեն լեզվով «նախազգուշացումներ» անելով։