Հայաստանի հետ հարաբերությունների կարգավորման Անկարայի հատուկ ներկայացուցիչը Ցեղասպանությունը ժխտող Սերդար Քըլըչն է

Անկարան Հայաստանի հետ հարաբերությունների կարգավորմանն ուղղված քայլերի քննարկման նպատակով համար հատուկ ներկայացուցիչ կնշանակի Վաշինգտոնում Թուրքիայի նախկին դեսպան Սերդար Քըլըչին:

Այս մասին հայտարարել է Թուրքիայի արտաքին գործերի նախարար Մևլյութ Չավուշօղլուն՝ կրկին ընդգծելով, որ Անկարան Հայաստանի հետ երկխոսության հարցում կգործի Ադրբեջանի հետ համակարգված։

Նշենք՝ 1984 թվականից Թուրքիայի արտաքին գերատեսչության աշխատանքներում ընդգրված 63-ամյա դիվանագետը, ով 2014-2021 թվականներին եղել է Վաշինգտոնում Անկարայի դեսպանը, Հայոց ցեղասպանության ժխտողական քաղաքականության ակտիվ ջատագովներից է։

Հիշեցնենք՝ դեկտեմբերի 13-ին Թուրքիայի արտգործնախարարը հայտարարել էր, որ Անկարան և Երևանը հարաբերությունների կարգավորման համար հատուկ ներկայացուցիչներ կնշանակեն, կվերականգնվի նաև Ստամբուլ-Երևան ավիահաղորդակցությունը։

Հաջորդ օրը ՀՀ ԱԳՆ խոսնակ Վահան Հունանյանը հայտարարել էր, որ հայկական կողմը ևս պատրաստ է ներկայացուցիչ նշանակել հարաբերությունների կարգավորմանն ուղղված քննարկումների համար: