Онлайн
Երկու երկրների հարաբերությունների կարգավորմանն ուղղված քայլերի քննարկման նպատակով Թուրքիան և Հայաստանը կնշանակեն հատուկ ներկայացուցիչներ։ Այս մասին երկուշաբթի օրը հայտարարել է Թուրքիայի արտաքին գործերի նախարար Մևլութ Չավուշօղլուն՝ ելույթ ունենալով երկրի խորհրդարանում։
«Անադոլու» գործակալության փոխանցմամբ՝ Թուրքիայի արտգործնախարարը հայտարարել է նաև Ստամբուլ-Երևան չարտերային թռիչքների վերականգնման մասին։
«Առաջիկայում մենք չարտերային թռիչքներ կսկսենք Երևանի և Ստամբուլի միջև»,-ասել է նա։
Չավուշօղլուն ընդգծել է, որ Հայաստանի հետ հարաբերությունների կարգավորմանն ուղղված քայլերի առնչությամբ Անկարան կգործի Ադրբեջանի հետ համաձայնեցված։
«Մենք Ադրբեջանի հետ ինտենսիվ դիվանագիտական ջանքեր ենք գործադրում կովկասյան տարածաշրջանում խաղաղություն և բարգավաճում հաստատելու համար»,-միաժամանակ ասել է թուրք դիվանագետը՝ չբացառելով նաև Հայաստանի հետ դիվանագիտական հարաբերություններ հաստատելու հնարավորությունը։
«Եթե Երևանը հավատարիմ մնա կառուցողական դիրքորոշմանը»,-շեշտել է Չավուշօղլուն։
