Կարմիր Շուկա-Շուշի ճանապարհից շուտով ադրբեջանական կողմն այլևս չի օգտվելու․ Արտակ Բեգլարյան

«Այո՛, որոշակի լկտի վարք լինում է ադրբեջանական կողմից, այդ թվում՝ ճանապարհներով անցնելիս, բայց պետք է նշեմ, որ Կարմիր Շուկա-Շուշի ճանապարհից շուտով՝ մի քանի ամսվա ընթացքում, ադրբեջանական կողմն այլևս ընդհանրապես չի օգտվելու։ Այս մասով լրացուցիչ աշխատանքներ տանում ենք նաև աշխատանքներ են տարվում այդ ճանապարհների անվտանգության մակարդակը բարձրացնելու, այդ թվում՝ գիշերային լուսավորվածության հարցերն են լուծվում, վերահսկողությունն է լրացուցիչ ուժեղացվում»,-այդ մասին այսօր հրավիրված առաջին առցանց ասուլիսի ժամանակ հայտարարեց Արցախի Հանրապետության պետական նախարար Արտակ Բեգլարյանը՝ նշելով, որ այս պահին ռուս խաղաղապահներն են երաշխավորում անվտանգությունը, ինչը, նրա դիտարկմամբ, խոշոր առումով, ապահովված է։

Նշենք՝ մեկ ամիս առաջ Արցախի պետական նախարար նշանակված Արտակ Բեգլարյանն այսօր հրավիրված առաջին առցանց մամլո ասուլիսում պատասխանել է թե՛ քաղաքացիների, թե՛ լրատվամիջոցների հարցերին, անդրադարձել պատերազմից հետո Ադրբեջանի վերահսկողության տակ անցած Հադրութի Հին Թաղեր ու Խծաբերդ գյուղերի վերաբերյալ հարցին, խոսել հակամարտության կարգավորման 3 սկզբունքներից 2-ի ժամանակավրեպ լինելու, ռուս խաղաղապահների առաքելության ժամկետների մասին։