Սևան մեկնող սեզոնային գնացքն արդեն աշխատում է

Սևանա լճում հանգիստ նախընտրողների համար «Հարավկովկասյան երկաթուղի» ընկերությունը (ՀԿԵ) հունիսի 14-ից գործարկել է Ալմաստ (Երևան)-Շորժա էլեկտրագնացքը, որը գործում է ուրբաթ, շաբաթ և կիրակի օրերին:

Ընկերությունից տեղեկացնում են, որ գնացքը Երևանի Քանաքեռ-Զեյթուն համայնքում գտնվող «Ալմաստ» գործարանին կից համանուն կառամատույցից մեկնում է ժամը 08:30՝ Սևանի կայարան ժամանելով 10:28, իսկ Շորժա՝ 11:28-ին:

Հակառակ ուղղությամբ էլեկտրագնացքը Շորժայի կայարանից մեկնում է 17:00-ին, Սևանից՝ 18:00՝ Երևան վերադառնալով ժամը 20:00-ին:

Տոմսի գինը մեկ ուղղությամբ կազմում է 600 դրամ մինչև Սևանի կայարան և 1 000 դրամ` մինչև Շորժա:

Նշենք՝ ՀԿԵ-ն նման սեզոնային էլեկտրագնացք գործարկում է ամեն ամառ՝ հանգստի համար առավել հարմարավետ պայմաններ ստեղծելու և դեպի Սևանա լիճ տանող ճանապարհները թեթևացնելու նպատակով: Երևան-Սևան էլեկտրագնացը նախկինում աշխատում էր շաբաթվա բոլոր օրերին՝ բացառությամբ չորեքշաբթիի, սակայն 2016 թվականի հուլիսից աշխատանքային օրերի թիվը կրճատվեց՝ բազմաթիվ անհարմարություններ ստեղծելով այդ ուղղությունը նախընտրող քաղաքացիների համար։

Պատրաստեց՝ Լիաննա Մարգարյանը