Онлайн
Հունիսի 15-ին ժամը 15։30-ին Երևանի երկաթուղային կայարանից Բաթումի կմեկնի Երևան-Բաթումի-Երևան երթուղում գործող այս տարվա առաջին գնացքը: Այս մասին տեղեկացնում է «Հարավկովկասյան երկաթուղի» ընկերությունը։
Հայաստանի մայրաքաղաքից գնացքը մեկնելու է ամեն օր՝ ժամը 15:30-ին՝ Բաթումի հասնելով 15 ժամ 40 րոպեում, հակառակ ուղղությամբ՝ 15 ժամ 50 րոպեում:
Իսկ Սևանա լճում հանգիստ նախընտրողների համար հունիսի 16-ից կգործարկվի Հրազդան-Ալմաստ (Երևան) –Շորժա սեզոնային էլեկտրագնացքը՝ աշխատելով ուրբաթ, շաբաթ և կիրակի օրերին:
Գնացքը Հրազդան կայարանից կմեկնի 6:45-ին՝ Երևանի «Ալմաստ» կառամատույց ժամանելով 08:10-ին: Իսկ «Ալմաստ» կառամատույցից դեպի Սևանա լիճ գնացքը կմեկնի ժամը 08:30-ին՝ Շորժայի կայարան հասնելով 11:28-ին:
Հակառակ ուղղությամբ էլեկտրագնացքը կմեկնի 17:00-ին՝ Երևան վերադառնալով ժամը 20:00-ին, Հրազդան՝ 21:42-ին:
