Онлайн
Կոնստանտին Զատուլինի մուտքը Հայաստանի Հանրապետություն (ՀՀ) արգելելու մասին լուրը խորը վրդովմունքով է ընդունվել Արցախի Հանրապետությունում (ԱՀ)․ տարածած հայտարարությունում ընդգծել է Արցախի Ազգային ժողովի (ԱԺ) արտաքին հարաբերությունների մշտական հանձնաժողովի նախագահ Վահրամ Բալայանը՝ արձագանքելով ՀՀ՝ Ռուսաստանի Դաշնության (ՌԴ) ԱՊՀ գործերի, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Զատուլինի՝ ՀՀ մուտքի արգելքի մասին որոշմանը։
Արցախի ԱԺ արտաքին հարաբերությունների մշտական հանձնաժողովի նախագահ Վահրամ Բալայանը զարմանալի է համարել, որ ՌԴ- ում հայկական շահերի պաշտպան, Արցախի մեծ բարեկամ և հայամետ պատգամավորի մուտքն արգելված էր Ադրբեջանում, իսկ հիմա՝ Հայաստանում:
«Կոնստանտին Զատուլինը իր պատգամավորական գործունեության ողջ ժամանակահատվածում, անկախ բոլոր արգելքներին և ճնշումներին, մշտապես կանգնած է եղել արցախահայության կողքին:
Հայանպաստ գործունեություն ծավալած ինչպես հայ, այնպես էլ օտարազգի գործիչների մուտքի արգելումը ՀՀ, առավել բարդացնում է առանց այն էլ մեր ծանր կացությունը: Նմանօրինակ գործելաոճն անընդունելի է: Սա ճանապարհ չէ...:
Հուսանք, որ այդ որոշումը կվերանայվի»,-ընդգծել է արցախցի պատգամավորը:
Արցախի ԱԺ պատգամավոր Գեղամ Ստեփանյանն էլ հայ գործընկերներին կոչ է արել իրավական խոչըդոտներ չստեղծել Հայաստան և Արցախ Կ․ Զատուլինի մուտքի համար․
Գեղամ Ստեփանյանը ֆեյսբուքյան իր էջում, մասնավորապես, գրել է․
«ՌԴ Պետդումայի պատգամավոր, հայ ժողովրդի և Արցախի մեծ բարեկամ Կոնստանտին Զատուլինին անցանկալի անձ հայտարարելու ՀՀ իշխանությունների քայլը մտահոգության տեղիք է տալիս։
Կոնստանտին Զատուլինը ռուսական այն եզակի խիզախ քաղաքական գործիչներից է, ով հետևողականորեն պաշտպանել է հայկական շահերը՝ անկախ ՀՀ-ում իշխող քաղաքական ուժից ու ղեկավարից, անկախ Ադրբեջանի քաղաքական ճնշումների փորձերից։ Այս առումով կարևոր եմ համարում նշել նաև այն փաստը, որ Արցախ այցելելու և Արցախի իշխանությունների հետ հանդիպումներ ունենալու համար նա դեռևս 2010 թ. հայտնվել էր Ադրբեջանի «սև ցուցակում»։
Հուսով եմ, որ ՀՀ իշխանությունները կվերանայեն իրենց այս որոշումը և կոչ եմ անում ՀՀ իմ գործընկերներին՝ իրավական խոչըդոտներ չստեղծելուՀայաստան և Արցախ Կոնստանտին Զատուլինի մուտքի համար»։
Հիշեցնենք՝ երեկ՝ հոկտեմբերի 25-ին, հայտնի դարձավ, որ արգելվել է ՀՀ ԱԺ ղեկավարության որոշմամբ՝ Կոնստանտին Զատուլինի մուտքը մեր երկիր։
Զատուլինը Տելեգրամում հրապարակել է Հայաստանի Ազգային ժողովի նամակը, որում, մասնավորապես, նշված է․
«ՀՀ Ազգային ժողովի ղեկավարության անունից հայտնում ենք, որ, ցավոք, Հայաստանի Հանրապետության մասին վերջին շրջանի Ձեր հայտարարությունները վնասում են մեր պետությունների բարեկամական և դաշնակցային հարաբերությունների զարգացմանը։ Սրանով պայմանավորված, ապագայում Ձեր այցը Հայաստանի Հանրապետություն համարվում է անցանկալի»։
Զատուլինն այդ որոշումը վիրավորական էր համարել՝ հայտարարելով, որ այն ինքնին վկայում է Հայաստանի իշխանությունների նոր կուրսի մասին։
