Ընդդիմադիր պատգամավորներին արգելել են մտնել Արցախ, Արցախի ԱԺ խմբակցությունների ղեկավարների հետ հանդիպումը կայացել է Աղավնոյի անցակետում

ՀՀ Ազգային ժողովի (ԱԺ) «Հայաստան» խմբակցությունը, որն այսօր ընդդիմադիր մյուս՝ «Պատիվ ունեմ» խմբակցության հետ բոյկոտել էր քառօրյայի նիստերն ու հայտարարել Արցախ մեկնելու մասին, հայտնում է, որ խմբակցության պատգամավորներին արգելվել է մուտք գործել Արցախ։

«Այս պահին տեղի է ունենում Նիկոլ Փաշինյանի և Իլհամ Ալիևի հերթական հանցավոր պայմանավորվածության գաղտնազերծումը։ Վերջիններս շատ արագ և միաժամանակ արձագանքեցին ԱԺ-ում ընդդիմադիր պատգամավորների հայտարարությանը, որ մեկնում ենք Արցախ և անցակետին փոխանցեցին Արցախ մեկնող քաղաքական գործիչների անունները՝ պահանջելով թույլ չտալ մեր մուտքը Արցախ։

Բացահայտվեց Արցախը մեկուսացնելու, այնուհետև հայաթափելու դավադիր գործարքի հերթական փաստը: Հատկանշական է, որ մեր այցի հետ կապված Ադրբեջանի և ՀՀ օրվա իշխանությունների արձագանքը նույնական էր և փոխլրացնող:

Տեղեկացնեմ, որ Արցախի խորհրդարանական բոլոր խմբակցությունների ղեկավարների հետ մեր հանդիպումն ամեն դեպքում կայացավ՝ Աղավնոյի անցակետում:

Մենք միասնական ու վճռական ենք Արցախի և Հայաստանի դեմ իրականացվող քաղաքականությունը վիժեցնելու և մեր երկրի շահերին տեր կանգնելու հարցում»,-ասված է «Հայաստան» դաշինքի տարածած հայտարարությունում։