«Կոնկրետ ռիսկ ենք տեսնում, երբ Հայաստանը կկառուցի և՛ ճանապարհը, և՛ երկաթուղին՝ Ադրբեջանը կհրաժարվի բացել սահմանը»․ Փաշինյանը՝ Ադրբեջանի հետ նոր համաձայնագիր ստորագրելու անհրաժեշտության մասին

«Մենք պատրաստ ենք մեր առաջարկների շրջանակներում բացել ճանապարհը և երկաթուղին: Կառուցել ճանապարհ և երկաթուղի, բայց անհրաժեշտ ենք համարում դե յուրե նշանակություն ունեցող համաձայնագիր ստորագրել Ադրբեջանի հետ: Ինչո՞ւ, որովհետև մենք շատ կոնկրետ ռիսկ ենք տեսնում, երբ Հայաստանը կկառուցի և՛ ճանապարհը, և՛ երկաթուղին, իսկ Ադրբեջանը կհրաժարվի բացել սահմանը: Եւ կստացվի, որ մի քանի հարյուր միլիոն դոլար ներդրում պահանջած ենթակառուցվածքներից չի կարողանա օգտվել ոչ Հայաստանը, ոչ Ադրբեջանը, ոչ երրորդ երկրները և Հայաստանը պարզապես կկորցնի մի քանի հարյուր միլիոն դոլար»,-կառավարության այսօրվա նիստի մեկնարկին իր ելույթում ասաց ՀՀ վարչապետ Նիկոլ Փաշինյանը՝ անդրադառնալով 2020-ի նոյեմբերի 9-ի հայտարարության 9-րդ կետով ստանձնած՝ տարածաշրջանային բոլոր տրանսպորտային և տնտեսական կապերի վերականգնելու պարտավորությանն ու Ադրբեջանի Արևմտյան շրջանները Նախիջևանին կապող ճանապարհի գործարկմանը։ Ի դեպ, որը, ըստ Փաշինյանի, Ադրբեջանը խեղաթյուրում է։

«Այսօր մենք ինչ ենք առաջարկում: Առաջարկում ենք երկաթուղու վերագործարկման մասին 2021թ. դեկտեմբերի 14-ին Բրյուսելում ձեռքբերված պայմանավորվածություններն արձանագրել դե յուրե, համաձայնեցնել երկաթուղու պարամետրերը և սկսել շինարարությունը: Կամ դա անել փաթեթով՝ ներառելով ավտոմոբիլային ճանապարհը, և մենք պատրաստ ենք սա անել այն պահից, երբ Ադրբեջանը դրական արձագանք կտա մեր առաջարկներին: Մեր գրավոր առաջարկներն, ի դեպ, մենք փոխանցել ենք նաև մեր մի շարք միջազգային գործընկերների, որոնց համար մեր առաջարկները տրամաբանական են, ընդունելի և հասցեագրում են տարածաշրջանի բոլոր երկրների շահերը»,-պարզաբանեց Փաշինյանը:

Վարչապետի ելույթի մանրամասները՝ տեսանյութում։