Ադրբեջանցի պատգամավորի՝ Երևանից արված գրառման մեկնաբանություններում խրախճանք է․ իրանագետ

«Բաքվի բռնապետի խորհրդարանի՝ Երևան ժամանած ներկայացուցիչն այնքան համարձակություն ունի, որ «Արցախը Ադրբեջան է!» ետնանկարով իր թվիթերյան օգտահաշվի միջոցով մեր մայրաքաղաքից ողջույններ է հղում աշխարհի ադրբեջանցիներին և շնորհավորում նրանց «Ջրի չորեքշաբթին»։

Մեկնաբանություններում «խրախճանք» է՝ «Երևանն Ադրբեջան է», «վստահ եմ՝ որոշ ժամանակ անց վերադառնալու ենք մեր հայրենիք Երևան» և այլ զառանցանքների տեսքով»,-այդ մասին ֆեյսբուքյան իր էջում գրել է իրանագետ Վարդան Ոսկանյանը։

Նրա ներկայացմամբ՝ «Ջրի չորեքշաբթին» Ադրբեջանում կովկասյան պարսիկներից (թաթերից) յուրացված նախանովրուզյան տոներից է, որը նվիրված է բնության չորս տարերքներից ջրին։

Հավելենք՝ իրանագետի հիշատակած ադրբեջանցի պատգամավորը՝ Սոլթան Մամադովը, Երևանում այսօր ընթացող «Եվրանեսթ» խորհրդարանական վեհաժողովի (ԽՎ) հանձնաժողովների նիստերի ժամանակ հնչեցրել է պաշտոնական Բաքվի հայտնի թեզերը, թե «հակամարտությունը լուծվել է,բոլոր ռազմագերիներն էլ՝ վերադարձվել»։