Онлайн
Ադրբեջանի և Թուրքիայի նախագահներն Աշխաբադում կայացած Տնտեսական համագործակցության կազմակերպության (ՏՀՏ) 15-րդ գագաթնաժողովում կրկին խոսել են «Զանգեզուրի միջանցքի» մասին։
Իլհամ Ալիևը, հիշեցնելով, որ կազմակերպության նախորդ գագաթնաժողովի ժամանակ գործընկերներին տեղեկացրել է «Զանգեզուրի միջանցքի» մասին՝ հայտարարել է, թե այսօր կարող է ասել, որ այն իրականություն է դառնում։
«Այս նոր տրանսպորտային ենթակառուցվածքը կդառնա Արևելք-Արևմուտք և Հյուսիս-Հարավ միջանցքների կարևոր մասը։ Վստահ եմ, որ ՏՀԿ անդամ պետությունները կօգտվեն այդ միջանցքից»,- APA լրատվական գործակալության փոխանցմամբ՝ ասել է Ադրբեջանի նախագահը։
Թուրքիայի նախագահ Ռեջեփ Էրդողանն էլ, իր հերթին, ընդգծել է, «Զանգեզուրի միջանցքի» նշանակությունը։
Ասելով, թե «Արևելք-Արևմուտք տրանսպորտային միջանցքը և Բաքու-Թբիլիսի-Կարս երկաթգիծը բեռնափոխադրումների համար կարևոր դեր են խաղում», Էրդողանը հայտարարել է, թե հայտնի է «Զանգեզուրի միջանցքի» նշանակությունը։
«Հարկ է հատուկ ուշադրություն դարձնել տրանսպորտային միջանցքների զարգացմանը»,-ասել է նա։
Հավելենք, սակայն, որ, ի հեճուկս թուրք-ադրբեջանական պարբերաբար շրջանառվող «Զանգեզուրի միջանցք»-ի բացման թեզին, հայաստանյան իշխանությունները շեշտում են, որ Հայաստանի, Ռուսաստանի և Ադրբեջանի ղեկավարների եռակողմ հայտարարություններով որևէ միջանցքի մասին խոսք չկա։
Ադրբեջանի արտաքին գործերի (ԱԳ) նախարար Ջեյհուն Բայրամովն էլ, թուրքական «Անադոլու» գործակալությանը տված հարցազրույցում, վերջերս իրարամերժ հայտարարություններ էր արել։ Նշելով, թե «միջանցք»-ի ստեղծման ուղղությամբ արդեն աշխատանքներ են տարվում, Բայրամովը հավելել էր․
«Տարածաշրջանում անհրաժեշտ է վերականգնել ճանապարհային և երկաթուղային կապերը․․․Եթե եռակողմ հայտարարության կետերը կյանքի կոչվեն, ապա միջանցքի բացումը երկար չի սպասեցնի։ Միջանցքի բացման ստույգ ժամկետը նշելը վաղաժամ է, սակայն գործընթացն գնում է, թեև դժվարությամբ»։
Պատրաստեց՝ Լիաննա Մարգարյանը
