10-ից 6-ը վերակենդանացման բաժանմունքում են, 4-ի վիճակը ծանր է, 2-ինը՝ ծայրահեղ ծանր․ «ԳԱԶԵԼ»-ի վթարից տուժածներից առողջական վիճակի մասին

Երևան-Գյումրի ավտոճանապարհին երեկ առավոտյան ուղևորատար «ԳԱԶԵԼ»-ի կողաշրջման հետևանքով տեղի ունեցած վթարի հետևանքով տուժած քաղաքացիներից 10-ը շարունակում են բուժումը:

ՀՀ առողջապահության նախարարությունից (ԱՆ) հայտնում են, որ տուժածներից 8-ը բուժում են ստանում «Արմենիա» հանրապետական բժշկական կենտրոնում, նրանցից 2-ը բուժհաստատություն են տեղափոխվել Աշտարակի բժշկական կենտրոնից:

««Արմենիա» ՀԲԿ-ում բուժում ստացող տուժածներից 6-ն այս պահին վերակենդանացման բաժանմունքում են, 4-ի վիճակը գնահատվում է ծանր, 2-ինը` ծայրահեղ ծանր:

Մյուս 2-ը գտնվում են նեյրովիրաբուժական բաժանմունքում: Վերջիններիս առողջական վիճակը բժիշկները գնահատում են բավարար:

Վթարից տուժած 2 քաղաքացի էլ բուժում է ստանում Գյումրի բժշկական կենտրոնում: Նրանց առողջական վիճակը գնահատվում է բավարար:

Բոլոր տուժածներն ունեն մարմնական տարբեր աստիճանի վնասվածքներ»,-մանրամասնում են առողջապահական գերատեսչությունից։

Հայտնել էինք, որ դեպքի առթիվ քրեական գործ է հարուցվել։ ՀՀ քննչական կոմիտից նշել էին, որ 5 անձի՝ այդ թվում «ԳԱԶԵԼ»-ի վարորդի մահվան ելքով վթարը ճանապարհաշինարարական աշխատանքների ընթացքում անվտանգության կանոնների չապահովման հետևանք է եղել։