Онлайн
Այսօր՝ հուլիսի 17-ին, ժամը 13:30-ից սկսած, ադրբեջանական զինված ուժերի (ԶՈւ) ստորաբաժանումները պարբերաբար կրակ են բացել հայ-ադրբեջանական սահմանի Երասխի հատվածում տեղակայված հայկական դիրքերի ուղղությամբ:
Այդ մասին հայտնում է ՀՀ պաշտպանության նախարարությունը (ՊՆ)՝ նշելով, որ հայ դիրքապահները դիմել են հակազդող գործողությունների:
Հայկական կողմից զոհեր և վիրավորներ չկան:
«Ժամը 21:00-ի դրությամբ իրադրությունը Երասխի սահմանագոտում հարաբերականորեն կայուն է»,-ասված է ՊՆ տարածած հաղորդագրությունում:
Նշենք՝ Երասխի հատվածում տեղակայված հայկական դիրքերը վերջին օրերին հակառակորդի նշանակետում են. երեկ առավոտյան էլ՝ ժամը 11:00-ից սկսած, ադրբեջանական ԶՈւ ստորաբաժանումները կրակ են բացել հայ-ադրբեջանական սահմանի այդ ուղղությամբ: ՀՀ ՊՆ-ն հայտնել էր, որ հայկական կողմից զոհեր և վիրավորներ չկան:
Նշենք՝ այսօր վարչապետի պաշտոնակատար Նիկոլ Փաշինյանը Եվրոպական խորհրդի նախագահ Շառլ Միշելի հետ հանդիպումից հետո ԶԼՄ ներկայացուցիչների համար բանակցությունների արդյունքներն ամփոփող հայտարարությունում շեշտել է. «Ադրբեջանը մտադիր է նոր ռազմական բախումներ հրահրել Արցախում և հայ-ադրբեջանական սահմանին, ինչի արտահայտությունը մենք այսօր տեսնում ենք հայ-ադրբեջանական սահմանի Նախիջևանի հատվածում»:
