Онлайн
Այս պահի դրությամբ մարտերի ուժգնությունը որոշակիորեն թուլացել է, կորուստների մասին թվային տվյալները կամփոփվեն ավելի ուշ. ռազմաճակատում տիրող իրավիճակի վերաբերյալ «Հայկական միասնական տեղեկատվական կենտրոն»-ում այսօր 22:00-ին հրավիրված ճեպազրույցում ասաց ՀՀ պաշտպանության նախարարության ներկայացուցիչ Արծրուն Հովհաննիսյանը:
Նա նշեց, որ այսօր վաղ առավոտյան հարավային ու հյուսիսային ուղղությամբ հակառակորդը փորձել է հարձակողական գործողություններ ծավալել, հյուսիսային ուղղությամբ մեկ-երկու գրոհներից հետո հետ է շպրտվել, հարավում տևական ժամանակ ծանր մարտերը շարունակվում էին։
«Կողմերը դիրքային փոփոխություններ, զորաշարժեր գրեթե չեն ունեցել։ Այս պահի դրությամբ մարտերի ուժգնությունը որոշակիորեն թուլացել է»,-ընդգծեց Արծրուն Հովհաննիսյանը:
Ի դեպ՝ ճեպազրույցին մասնակցում էր նաև «Արիության համար» մեդալով հետմահու պարգևատրված Ալբերտ Հովհաննիսյանի հայրը՝ Արտակ Հովհաննիսյանը:
«Բարձր ձայնով հայրենասիրական երաժշտություն լսելով կամ պտտվելով՝ մենք չենք օգնում կամ ոգևորում մեր զինվորներին: Բոլորս պարտավոր ենք իրենց կողքին լինել ու պետք է լինենք»,-ասաց նա:
Հովհաննիսյանների ճեպազրույցի մանրամասները՝ տեսանյութում:
Նշենք՝ հայրենիքի պաշտպանության մարտերում նահատակված Ալբերտ Հովհաննիսյանի հայրը այսօր ավելի վաղ ֆեյսբուքյան գրառմամբ կոչ էր արել թևաթափ չլինել:
«Թևաթափ լինելու ո՛չ ժամանակ ունենք, ո՛չ իրավունք»,-ընդգծել էր Արտակ Հովհաննիսյանը:
