«Ես անկեղծորեն ափսոսում եմ, որ հնարավոր չէր փրկել բոլորին: Իմ մտքերն ու հույզերը յուրաքանչյուր ընտանիքի հետ են: Անիրատեսական է ակնկալել, որ ռազմական գործողությունների ժամանակ մենք զոհեր չենք ունենա: Բայց մենք՝ բոլորս, համոզվեցինք, թե ինչքան հերոսաբար էին կռվում մեր զինվորներն ու հրամանատարները: Նրանիցից 75-ը հավերժ երիտասարդ մնացին՝ իրենց մարմիններով ծածկելով Արցախն ու Հայաստանը»,-այդ մասին այսօր հրապարակված «Խոսենք անկեղծ. Սերժ Սարգսյանը՝ Ապրիլյան պատերազմի մասին» խորագրով տեսանյութերից 4-րդ ասում է ՀՀ երրորդ նախագահ Սերժ Սարգսյանը՝ պատասխանելով հարցին, թե ինչո՞ւ մենք կորցրեցինք զինվորների սպաների այդքան կյանքեր:
Նշենք՝ ըստ ՀՀ պաշտպանության նախարարության տրամադրած տեղեկանքի՝ 2016 թվականի ապրիլի 2-ից 5-ն ընկած ժամանակահատվածում հակառակորդի հետ անմիջական շփման գծում տեղի ունեցած մարտական գործողությունների ժամանակ զոհվել են 64 զինծառայողներ և 13 աշխարհազորայիններ ու պահեստազորայիններ, այդ թվում՝
սպաներ՝ 15,
պայմանագրային զինծառայողներ՝ 15,
ժամկետային պարտադիր զինծառայողներ՝ 34,
աշխարհազորայիններ՝ 11,
պահեստազորայիններ՝ 2։
Անհայտ կորած `
1 սպա` կապիտան ԳաբոյանԱրգիշտի Արծվիի:
Ոչ մարտական կորուստներ․
ապրիլի 2-ից 13-ն ընկած ժամանակահատվածում սահմանային լարվածության ուժգնացման պայմաններումկորուստները կազմել են.
զինծառայողներ՝ 9,
աշխարհազորայիններ՝ 2,
հակառակորդի հանցավոր գործողությունների արդյունքում զոհված ԼՂՀ խաղաղ բնակիչներ՝ 4,
Ընդամենը` 15 զոհված/մահացած:
Ընդհանուրը` 92 զոհված/մահացած:
Իսկ հարցին, թե ինչպե՞ս է կգնահատի հայկական բանակի գործողությունները՝ Սերժ Սարգյսանն ասում է.
«Արտաքին հետախուզական տվյալների համաձայն՝մենք հակառակորդին հասցրեցինք չորսից հինգ անգամ ավելի զինվորների, սպաների, այդ թվում՝ ավագ սպաների և սպառազինության կորուստ: Նույնիսկ մեր ընդդիմախոսները վերջին ժամանակներս սկսեցին գրել, այն մասին, որ ադրբեջանցիները, իրենց տվյալներով, կորցրել են 1000-ից ավելի զինվորներ»:
Տեսանյութում ՀՀ երրորդ նախագահը նաև կիսվում է Ապրիլյան պատերազմից հետո ունեցած զգացողություններով՝ ասելով.
«Այդպիսի մեծ մարտից ու հաղթանակից հետո մենք տխուր էինք և սգավոր, բայց, միևնույն ժամանակ, հպարտանում էինք մեր զինվորներով, սպաներով, գեներալներով, բոլորով՝ բոլոր նրանցով, ովքեր մասնակցել են այդ հերոսամարտին»:
Նշենք՝ այսօր ավելի վաղ հայտարարվեց, որ Հայաստանի երրորդ նախագահ Սերժ Սարգսյանը խախտում է լռությունը։ Նրա ցանկությունն է, որ յուրաքանչյուր քաղաքացի հնարավորություն ունենա հանրային հետաքրքրություն ունեցող հարցերի վերաբերյալ անձամբ իրենից լսելու, թե ինչ է եղել իրականում։
«Խոսենք անկեղծ. Սերժ Սարգսյանը՝ Ապրիլյան պատերազմի մասին» խորագրով հրապարակված տեսանյութերից մեկում Սերժ Սարգսյանն անդրադարձել է հակառակորդի գրաված 400 հա տարածքին՝ նշելով, որ չի պնդել, որ մեր բանակը ետ վերցնի որովհետև առավելությունը տվել է մեր զինվորների կյանքին:
Պատրաստեց՝ Լիաննա Մարգարյանը