Գերմանիայից բժիշկների հումանիտար առաքելությունը մեկնեց Հայաստան
Երկշաբաթյա հումանիտար առաքելությամբ այսօր՝ հուլիսի 13-ին, Հայաստան է ուղևորվել գերմանացի բժիշկների և առողջապահության համակարգի մասնագետների պատվիրակությունը:
Գերմանիայում Հայաստանի դեսպանությունից հայտնում են, որ առաքելությունը կազմակերպվել է Գերմանիայի դաշնային կառավարության կողմից՝ գերմանական «#ISAR» Միջազգային որոնողական և փրկարար կազմակերպության, «#Caritas International» կազմակերպության և Ռոբերտ Կոխ ինստիտուտի հետ համատեղ:
Դեսպանությունից հավելում են, որ Հայաստանում գտնվելու ողջ ընթացում գերմանացի մասնագետները Հայաստանի մի քանի հիվանդանոցներում կաջակցեն հայ բժիշկներին #COVID19 համավարակի դեմ պայքարում, կկիսվեն այս ոլորտում գերմանական օրինակելի փորձով:
Ավելի վաղ հայտնել էինք, որ, ի թիվս Ֆրանսիայի, Լիտվայի, Ռուսաստանի և Իտալիայի՝ կորոնավիրուսի դեմ պայքարում Հայաստանի բժիշկներին օգնության ձեռք կմեկնի նաև Գերմանիան:
Պատրաստեց՝ Լիաննա Մարգարյանը