Զբոսանքի և մոտակա առևտրի օբյեկտներ հաճախելու սահմանափակումը հանվել է. ՀՀ պարետը նոր որոշում է հրապարակել

Տեղաշարժի՝ այս օրերին գործող սահմանափակումների ցանկից հանվել է բնակության վայրից 1 կմ հեռավորության վրա զբոսնելու սահմանափակումը, ըստ որի քաղաքացիները կարող են զբոսանքի դուրս գալ բնակության վայրից ոչ ավել, քան 1 կիլոմետր հեռավորությամբ՝ ոչ ավել, քան 2 չափահաս անձով կամ ընտանիքի անդամներով:

ՀՀ պարետի 2020 թ. մարտի 31-ի N 27 որոշման մեջ փոփոխություններ և լրացումներ կատարելու վերաբերյալ այսօր հրապարակված որոշման մեջ ասված է.

«Ղեկավարվելով «Հայաստանի Հանրապետությունում արտակարգ դրություն հայտարարելու մասին» Հայաստանի Հանրապետության կառավարության 2020 թվականի մարտի 16-ի թիվ 298-Ն որոշմամբ` պարետի՝ 2020 թվականի մարտի 31-ի

«Արտակարգ դրության իրավական ռեժիմով պայմանավորված Հայաստանի Հանրապետության ողջ տարածքում կիրառվող սահմանափակումների վերաբերյալ» N 27 որոշման մեջ կատարել հետևյալ փոփոխություններն ու լրացումները՝

1. Հավելված N 1-ի 5-րդ կետը խմբագրել հետևյալ բովանդակությամբ՝ «5. Սույն հավելվածի 1-ին կետից բացառություն են կազմում՝

1) Հավելված N 2-ով թույլատրված՝ բնակության, ինքնամեկուսացման կամ աշխատանքի վայրից քաղաքային բնակավայրերում առավելագույնը 500 մետր, իսկ գյուղական բնակավայրերում առավելագույնը 1 կիլոմետր հեռավորության վրա գտնվող առևտրի իրականացման վայրեր և դրանցից դուրս գործող առևտրի օբյեկտներ հաճախելը.

2) Բնակության վայրից ոչ ավել, քան 1 կիլոմետր հեռավորության վրա ֆիզիկական վարժություններ կամ հեծանվավարություն իրականացնելը.

3) Բնակության վայրից ոչ ավել, քան 1 կիլոմետր հեռավորությամբ զբոսնելը՝ ոչ ավել, քան 2 չափահաս անձով կամ ընտանիքի անդամներով:

5.1. 5-րդ կետով սահմանված դեպքերում անհրաժեշտ է սույն հավելվածի Ձև 2-ով սահմանված՝ տեղեկությունները պարունակող թղթային կամ հեռախոսային հավելվածի միջոցով լրացված թերթիկի և անձը հաստատող փաստաթղթի առկայություն»:

2. Սույն որոշումն ուժի մեջ է մտնում հրապարակման պահից»:

Հիշեցնենք՝ երեկ Կորոնավիրուսի տարածման կանխարգելման աշխատանքները համակարգող հանձնաժողովի նիստում քննարկվել էր տեղաշարժի սահմանափակումները մեղմելու հնարավորությունները:

Այսօր ֆեյսբուքյան ուղիղ եթերում վարչապետ Նիկոլ Փաշինյանն ասել էլ, որ եթե արտառոց բան չպատահի, առաջիկա 10 օրում կհանվեն տնտեսական գործունեության բոլոր սահմանափակումները: