Онлайн
Նոր տիպի կորոնավիրուսի դեմ մղվող գլոբալ պայքարի համատեքստում Հայաստանի և Ադրբեջանի արտգործնախարարներ Զոհրաբ Մնացականյանի և Էլմար Մամեդյարովի՝ նախօրեին կայացած տեսակոնֆերանսում առանձնահատուկ ընդգծվել է հրադադարի ռեժիմի անվերապահ պահպանման և ամրապնդման ուղղությամբ քայլերի ձեռնարկման անհրաժեշտությունը:
«Այս տեսակետից ԵԱՀԿ Մինսկի խմբի համանախագահները կարևորել են իրենց հայտարարությունը և ՄԱԿ գլխավոր քարտուղարի համաշխարհային զինադադարի վերաբերյալ կոչը: Մասնակիցները քննարկեցին տարածաշրջանում նոր տիպի կորոնավիրուսի տարածման արդյունքում ստեղծված իրավիճակը՝ ընդգծելով, որ այս նոր մարտահրավերին առերեսվում են տարածաշրջանի բոլոր ժողովուրդները՝ անկախ քաղաքական սահմաններից: Անդրադարձ կատարվեց տարածաշրջանում տեղի ունեցած վերջին զարգացումներին»-փոխանցում են ՀՀ արտաքին գործերի նախարարությունից՝նշելով, որ ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ստեֆան Վիսկոնտիի (Ֆրանսիա), Էնդրյու Շոֆերի (ԱՄՆ), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրչիկի միջնորդությամբ և մասնակցությամբ կայացած խորհրդակցությունների արդյունքներով ընդունվել է Հայաստանի և Ադրբեջանի արտգործնախարարների և ԵԱՀԿ Մինսկի խմբի համանախագահների համատեղ հայտարարություն:
Հայտարարությունը՝ ստորև.
«Հայաստանի ԱԳ նախարար Զոհրաբ Մնացականյանը, Ադրբեջանի ԱԳ նախարար Էլմար Մամեդյարովը և ԵԱՀԿ համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Էնդրյու Շոֆերը (ԱՄՆ) մարտ ամսվա կեսերից հեռավար եղանակով պարբերական խորհրդակցություններ են անցկացրել, այդ թվում՝ ապրիլի 21֊ի համատեղ տեսակոնֆերանսը։ ԵԱՀԿ գործող նախագահի անձնական ներկայացուցիչ Անջեյ Կասպրչիկը նույնպես մասնակցել է այս խորհրդակցություններին։
Խորհրդակցությունների ընթացքում մասնակիցները քննարկել են գլոբալ առողջապահական ճգնաժամի ազդեցությունը տարածաշրջանի վրա և տեղում տեղի ունեցած վերջին զարգացումները: Նրանք անդրադարձել են նաև Լեռնային Ղարաբաղի խաղաղ կարգավորման գործընթացում հետագա քայլերին՝ համահունչ 2020 հունվարի 30-ին Ժնևում արված համատեղ հայտարարությանը:
Հաստատվեց, որ COVID-19 համավարակի հետևանքով ստեղծված արտասովոր իրավիճակի պատճառով նախկինում ձեռքբերված հումանիտար միջոցառումների իրականացումը հետաձգվել է: Նախարարների միջև առերես հանդիպումների և համանախագահների տարածաշրջան այցելությունների վերաբերյալ Ժնևում ձեռքբերված պայմանավորվածությունները նույնպես հետաձգվել են: Այնուամենայնիվ, վերոնշյալ գործողությունները նախապատրաստելուն ուղղված անհրաժեշտ աշխատանքները շարունակվում են:
Համանախագահներն ընդծեցին հրադադարի ռեժիմի անվերապահ պահպանման և ստեղծված իրավիճակում սադրիչ գործողություններից զերծ մնալու կարևորությունը և կոչ արեցին կողմերին ձեռնարկել հետագա միջոցառումներ լարվածության նվազեցման ուղղությամբ։ Նրանք նաև բարձր գնահատեցին ստեղծված իրավիճակում ԵԱՀԿ գործող նախագահի անձնական ներկայացուցչի շարունակական աշխատանքը և ընդգծեցին մոնիթորինգային աշխատանքները հնարավորինս շուտ վերսկսելու անհրաժեշտությունը։
Հաշվի առնելով վիթխարի մարտահրավերները, որոնց ներկայումս առերեսվում են բոլոր ժողովուրդները՝ անկախ քաղաքական սահմաններից, և որոնք ծառայում են որպես խիստ հիշեցում յուրաքանչյուր մարդկային կյանքի արժեքի մասին, ԱԳ նախարարները և համանախագահները հույս հայտնեցին, որ գլոբալ համավարակին արձագանքելու հարցում ցուցաբերված վճռականությունը ստեղծարար և կառուցողական խթան կհաղորդի խաղաղ գործընթացին: Համանախագահները ուշադրություն հրավիրեցին ՄԱԿ գլխավոր քարտուղարի՝ ներկա առողջապահական ճգնաժամի ժամանակաշրջանում հրադադարի միջոցառումների վերաբերյալ մարտի 23-ի ուղերձին և համանախագահների մարտի 19-ի հայտարարությանը:
Արտգործնախարարները և համանախագահները համաձայնեցին սերտ կապի մեջ մնալ և հնարավորինս շուտ շարունակել առերես բանակցությունները»:
