Հնարավոր վարակների տարածումը կանխարգելելու նպատակով Երևանի խոշոր սուպերմարկետներում ախտահանման աշխատանքներ են իրականացվում

Հաշվի առնելով վերջին շրջանում ակտիվացած սուր շնչառական վարակների, մասնավորապես, կորոնավիրուսի վտանգը, ՀՀ սննդամթերքի անվտանգության տեսչական մարմնի հանձնարարությամբ, Երևանի խոշոր սուպերմարկետներում, որպես կանխարգելիչ միջոցառում, իրականացվում են ախտահանման աշխատանքներ՝ օրվա ընթացքում 3-4 անգամ պարբերականությամբ:

Այս մասին հայտնում են տեսչական մարմնից՝ ընդգծելով, որ ախտահանվում են հատկապես այն հատվածներն ու մակերեսները, որոնց անմիջականորեն կարող են հպվել սպառողները:

Տեսչական մարմինը հորդորում է իրացման կետերին իրենց տարածքներում ևս անցկացնել կանխարգելիչ ախտահանման միջոցառումներ՝ թույլ չտալու համար հնարավոր վարակների տարածումը:

Նշենք՝ այսօրվա տվյալներով՝ Հայաստանում կորոնավիրոսով վարակման 1 դեպք է արձանագրված։ Վարակը հայտնաբերվել է փետրվարի 28-ին Թեհրանից օդանավով Հայաստան ժամանած և կամովին բժշկական կենտրոն ներկայացած 29-ամյա երիտասրդի մոտ։

Նա, ինչպես և նրա հետ ռիսկային շփում ունեցած 32 անձ մեկուսացվել է և գտնվում է Ծաղկաձորի «Գոլդեն փելիս» հյուրանոցում: