Հայ զինծառայողը Ադրբեջանի սահմանը հատելուց առաջ մարմնական վնասվածքներ չի ունեցել. Քննչական կոմիտե

ՀՀ քննչական կոմիտեն, հաշվի առնելով հանրության հետաքրքրությունը, հայտնում է, որ ՀՀ քննչական կոմիտեի զինվորական քննության գլխավոր վարչություն (ՔԿ ԶՔԳՎ) առաջին կայազորային քննչական բաժնում ՀՀ քրեական օրենսգրքի 362-րդ հոդվածի 2-ին մասով և ՀՀ քրեական օրենսգրքի 359-րդ հոդվածի 1-ին մասով նախատեսված հանցագործությունների հատկանիշներով քննվող քրեական գործով ձեռնարկված քննչական գործողությունների արդյունքում պարզվել է, որ 12.08.2019թ.-ի ժամը 10:30-ի դրությամբ՝ մինչ Ա.Ղազարյանի կողմից մարտական դիրքը թողնելը՝ գլխի ծոծրակային շրջանում, սրունքների շրջաններում կամ մարմնի այլ հատվածներում Ա.Ղազարյանը մարմնական վնասվածքներ չի ունեցել:

Ինչ վերաբերում է նրա ձախ ձեռքի ցուցամատի վրա առկա վնասվածքին, ապա 24.07.2019թ.-ին Ա.Ղազարյանը զորամասից ուղեգրվել է Մարտունու զինհոսպիտալ, որտեղ տեղային անզգայացումով կատարվել է ձախ ձեռքի 2-րդ մատի կոշտուկի հեռացում, ինչի մասին արձանագրված է զինհոսպիտալի ամբուլատոր հիվանդների հաշվառման մատյանի մեջ, ինչպես նաև, այդ մասին գրառում է կատարվել Ա.Ղազարյանի բուժգրքույկում:

Վերոգրյալի մասին Ա.Ղազարյանը տեղեկացրել է նաև եղբորը` Արմեն Ղազարյանին:

Քրեական գործով նախաքննությունը շարունակվում է:

Հիշեցնենք՝ Արցախի Հանրապետության պաշտպանության նախարարությունը օգոստոսի 12-ին տեղեկություն էր տարածել այն մասին, որ ՊԲ հարավ-արևելյան ուղղությամբ տեղակայված զորամասերից մեկում 19-ամյա զինծառայող Արայիկ Ղազարյանը դեռևս չպարզված հանգամանքներում լքել է մարտական դիրքը՝ հայտնվելով Արդրբեջանում։

ՀՀ օմբուդսմենը հայտնել է Ադրբեջանում հայտնված հայ զինծառայողի հարցով միջազգային կառույցներին դիմելու մասին։