Онлайн
Երևանի լսողության խնդիր ունեցող երեխաների (ԼԽՈՒԵ) հատուկ կրթահամալիրի սաներն ու շրջանավարտները «Ես էլ եմ զինվոր» խորագրով մշակութային միջոցառման շրջանակում ելույթ են ունեցել Տավուշում։
Նախաձեռնության և գաղափարի հեղինակը Թովմաս ուրարակիր Առաքելյանինն է, որը լսողական խնդիրներ ունեցող անձանց հանդեպ հետարքրքրություն է դրսևորելՏավուշի թեմի երիտասարդների կողմից Սբ. Հարության տոնին նվիրված տեսանյութի հրապարակումից հետո, որում լսողական հաշմանդամություն ունեցող 12-ամյա Արմանը ժեստերի լեզվով ավետում է՝ «Քրիստոս հարեավ ի մեռելոց»:
«Ամեն ելույթից հետո հուզմունքս ավելանում էր: Ուրախություն էր պարգևում այն, որ մեր երեխաները վկայում են մարդու կատարելության մասին: Բացարձակ չկար որևէ բանի պակասի, խախտումի կամ խղճահարության զգացում ո՛չ իմ մեջ, ո՛չ էլ, վստահ եմ՝ դահլիճում: Եվ եթե որևէ մեկն ունենա այդ զգացումը մեր երեխաների հանդեպ, ուրեմն նա անարգանք ունի Աստծո ստեղծագործության՝ մարդու հանդեպ»,- Տավուշի մարզպետարանի լրատվության բաժնի հաղորդմամբ՝ ասել է Հայ Առաքելական եկեղեցու Տավուշի թեմի առաջնորդ Բագրատ եպիսկոպոս Գալստանյանը։
«Ես էլ եմ զինվոր» խորագրով մշակութային միջոցառմանը, մասնակցել են նաև Տավուշի թեմի մանկապատանեկան երգչախումբը և «Հույսի կամուրջ» ՀԿ Իջևանի մասնաճյուղի սաները։ Ներկայացվել են մնջախաղային բեմադրություններ, երգ, պար, հումոր: Համերգն ավարտվել է ժեստերի լեզվով թարգմանված Տերունական աղոթքով:
Երևանի լսողության խնդիր ունեցող երեխաները Տավուշում նաև պատարագի են մասնակցել, այն մատուցվել է ժեստերի լեզվով, Հաղարծնավանքում էլ մասնակցել են գաթա թխելու արարողության:
