Онлайн
«Բարգավաճ Հայաստան» խմբակցության պատգամավոր Գագիկ Ծառուկյանի նկատմամբ քրեական հետապնդում հարուցելու և պատգամավորական մանդատից զրկելու գործընթաց սկսելու հարցով «Քաղաքացու որոշում» կուսակցության ներկայացրած հաղորդումը ՀՀ Գլխավոր դատախազությունն ուղարկել է Հատուկ քննչական ծառայություն (ՀՔԾ):
«Քրեադատավարական օրենքով նախատեսված հաղորդում է ներկայացվել հանցագործության մասին: Քրեական դատավարության օրենքը նախատեսում է հաղորդումների քննարկման ընթացակարգ: Ղեկավարվել ենք այդ ընթացակարգով, հաղորդումն ուղարկել ենք Հատուկ քննչական ծառայություն, ՀՔԾ-ին հանձնարարվել է քրեական դատավարության օրենսգրքի 180 հոդվածով նախատեսված ընթացակարգերը ձեռնարկել, և ստուգողական գործողություններ կկատարվեն, դրանց արդյունքում նախաքննական մարմինը պարտավոր է լինելու տալ իրավական գնահատական»,-այսօր՝ մայիսի 2-ին, խորհրդարանում լրագրողների հետ զրույցում ասել է ՀՀ գլխավոր դատախազ Արթուր Դավթյանը:
Հիշեցնենք՝ 2018 թվականի դեկտեմբերի 9-ին կայացած ԱԺ արտահերթ ընտրություններում 8533 քվե ստացած ու խորհրդարան չանցած «Քաղաքացու որոշում» սոցիալ դեմոկրատական կուսակցությունը՝ ի դեմ գործադիր մարմնի քարտուղար Սուրեն Սահակյանի, դիմում էր ներկայացրել ԱԺ նախագահ Արարատ Միրզոյանին և ՀՀ Գլխավոր դատախազ Արթուր Դավթյանին «Բարգավաճ Հայաստան» խմբակցության պատգամավոր Գագիկ Ծառուկյանի նկատմամբ քրեական հետապնդում հարուցելու և պատգամավորական մանդատից զրկելու գործընթաց սկսելու հարցով։ Հիմքը՝ պատգամավորի հրապարակային ելույթներն են, որոնք ըստ կուսակսության, հակասում են ՀՀ Սահմանադրությունում ամրագրված պատգամավորի ձեռնարկատիրական գործունեությամբ զբաղվելու արգելքի մասին դրույթին։
Պատրաստեց՝ Լիաննա Մարգարյանը
