Онлайн
«Նոյն իջնում է Արարատից» և աշխարհի արարումն ազդարարվում է խելահեղ «Քաոս»-ով. երեկ՝ սեպտեմբերի 14-ի երեկոյան, Հայաստանի Ազգային պատկերասրահում հանդիսավոր արարողությամբ, բարձրաստիճան այրերի ու հրավիրյալների ներկայությամբ տրվել է հայազգի աշխարհահռչակ ծովանկարիչ Հովհաննես Այվազովսկու ծննդյան 200-ամյակին նվիրված «Արարում» ցուցահանդեսի բացման մեկնարկը:
Շուրջ 52 գեղանկար, 26 գրաֆիկական և 1 դեկորատիվ-կիրառական արվեստի նմուշ, 20 վավերագիր. ցուցահանդեսում ներկայացված կտավներում Այվազովսկին իր արվեստի սիրահարներին բացահայտվում է նորովի՝ երբևէ չցուցադրված գրաֆիկական գործերով, բնանկարներով և ճեպանկարներով:
Հայաստանի Ազգային պատկերասրահում շուրջ 850 քառակուսի մետր տարածքում ներկայացված են ինչպես պատկերասրահի մշտական ցուցադրությունում առկա ծովանկարչի գործերը, այնպես էլ՝ Մայր Աթոռի տրամադրած երկու կտավները, աշխատանքներ՝ բերված ռուսական թանգարաններից և աշխարհի արարումը խորհրդանշող հռչակավոր «Քաոսը», որը մեծ դժվարություններով, այդուհանդերձ, հնարավոր եղավ Վենետիկի Մխիթարյան միաբանության հավաքածուից բերել Հայաստան:
Կտավն առաջին անգամ է ցուցադրվում Հայաստանում: Այն Այվազովսկու նվերն է Հռոմի պապին՝ 1841 թվականին, որն էլ Հռոմի պապը նվիրել է Մխիթարյան միաբանությանը՝ 1901 թվականին:
«Նկարը պատմական է բոլոր առումներով՝ սկսած բովանդակությունից, դրա շուրջ ծավալված պատմությունից, շրջանակից, որը պահպանված է հենց Այվազովսկու ժամանակներից, չի փոխվել մինչ օրս»,-օրեր առաջ ցուցահանդեսի բացման առիթով լրագրողների հետ հանդիպմանը նշել էր Հայաստանի Ազգային պատկերասրահի թանգարանային կառավարման գծով փոխտնօրեն Նաիրա Եղիազարյանը:
Ցուցահանդեսը բաց է լիենլու արվեստասերների առաջ մինչև 2018 թ. հունվարի 15-ը։
Հովհաննես Այվազովսկու ծննդյան 200-ամյակին նվիրված՝ ցուցահանդեսին զուգահեռ այսօր և վաղը Հայաստանի ազգային պատկերասրահի որմնանկարների դահլիճում անցկացվելու է «Ծովանկարչության սահմանները» խորագրով միջազգային գիտաժողով, որին մասնակցելու են թե՛ Հայաստանի, եւ թե՛ արտերկրի ճանաչված արվեստաբաններ, արվեստագետներ, թանգարանային գործի վարպետներ:
Հայաստան ժամանածպատվավոր հյուրերին կնվիրվի Այվազովսկու հոբելյանի առիթով Կենտրոնական բանկի կողմից թողարկված արծաթե հուշադրամներ, ոմանց նաև՝ Այվազովսկու անվան շքանշան։
Հավելենք նաև, որ աշխարհահռչակ ծովանկարիչի ծննդյան 200-ամյա հոբելյանն ընդգրկված է ՅՈՒՆԵՍԿՕ-ի 2017 թվականի հիշարժան տարեթվերի շարքում:
Հեղինակ՝ Լիաննա Մարգարյան
