Онлайн
Վրաստանի նախագահ Սալոմե Զուրաբիշվիլին կոչ է արել ջավախահայերին վրացերեն սովորել:
«Ես շատ եմ ուզում, որ թե դուք և թե ձեր երեխաները Վրաստանի լիիրավ քաղաքացիներ դառնաք: Այդ իսկ պատճառով ես այդքան ջանք գործադրեցի, որպեսզի Վրաստանում օրինականացվի երկքաղաքացիության ինստիտուտը: Այդ լրացումը տեղ գտավ Սահմանադրության տեքստում, և այսօր յուրաքանչյուրը կարող է վերականգնել իր վրացական քաղաքացիությունը»,-այդ մասին Ախալքալաք կատարած այցի շրջանակում Մշակույթի տանն իր ելույթում ասել է Վրաստանի նախագահը՝ ընդգծելով, որ դրա համար հարկավոր է, որ քայլերը կատարվեն երկու կողմերից։
«Դրա համար դուք պետք է մեկ քայլ կատարեք` սովորեք պետական լեզուն: Լեզվին տիրապետեք գոնե այնպիսի համեստ մակարդակում, որ կարողանաք հանձնել այն փոքրիկ քննությունը, որով ուղեկցվում է քաղաքացիության վերականգնման գործընթացը: Դա խորհրդանշական է բայց շատ կարևոր»,-ասել է Սալոմե Զուրաբիշվիլին տեղի բնակիչներին։
Վրաստանի նախագահը Ախալքալաք է ժամանել նախօրեին՝ «Մայրենի լեզվի» օրվա տոնակատարության շրջանակներում: Այցի ընթացքում նա մասնակցել է նաև Ախալքալաքի մշակույթի տան պատին վրացական այբուբենի տառերը պատկերող հուշարձանի բացմանը:
