ՀՀ վաստակավոր նկարչուհի Աննա Հարությունյանի «Ժամանակի փոխակերպումն արվեստների միջոցով» խորագրով հեղինակային ծրագրում ներկայացված են արվեստի տարբեր ճյուղերը:
Արվեստասերները ծրագիրը դիտելու հնարավորություն կունենան ապրիլի 26-ին Կ. Ս. Ստանիսլավսկու անվան ռուսական դրամատիկական թատրոնում:
Հայերեն և ֆրանսերեն ներկայացման նպատակն է նորովի մատուցել հայ մշակույթը: Ծրագրի հիմքում ընկած են Աննա Հարությունյանի «Ու ոչ մի բան չկար…», «Աշխարհի ստեղծումը», «Աշխարհի խաչելությունը», «Աշխարհի 7 խորհրդանիշները», «Աշխարհի պատուհանը» մոնումենտալ նկարները:
«Ժամանակի փոխակերպումն արվեստների միջոցով» ծրագիրը ներառում է նկարչություն, երաժշտություն, գրականություն, հագուստի մոդելավորում, ժամանակակից տեխնիկայի օգտագործում, մասնավորապես՝ լեդ էկրան, 3D անիմացիա, մնջախաղ, լուսային, ձայնային և այլ էֆեկտներ:
Ներկայացումն ընդգրկվել է 2019 թվականի ապրիլին Երևանում անցկացվող ֆրանկոֆոնիայի օրերի շրջանակներում իրականացվող մշակութային ծրագրերի ցանկում, անցկացվում է ՀՀ մշակույթի նախարարության և ՀՀ-ում Շվեյցարիայի դեսպանատան աջակցությամբ: