Անմտածված վայրագություն․ «Սպայկա»-ն՝ ընկերության տնօրենին կալանավորելու որոշման մասին

«Սպայկա» ընկերությունը՝ ընկերության հիմնադիր և գլխավոր տնօրեն Դավիթ Ղազարյանի կալանավորման որոշման վերաբերյալ հայտարարություն է տարածել՝ այն որակելով ապօրինի ու Հայաստանի հեղինակության նկատմամբ անմտածված վայրագություն։

Հայտարարության մեջ ասված է.

«Այսօր ՊԵԿ-ի քննչական ծառայության միջնորդությամբ Կենտրոն դատարանի որոշմամբ Սպայկա ընկերության տնօրեն Դավիթ Ղազարյանի հանդեպ կիրառվեց ոչ օրինաչափ կալանք քրեաիրավական գործիքը: Սա խոսում է ՊԵԿ-ի բիրտ և դատական համակարգի փտած գործելաոճի մասին: Ընկերության տնօրենը որևէ կերպ երբևէ չի խոչընդոտել քննչական որևէ գործողությանը և բազմիցս հայտարարել է, որ պատրաստ է համագործակցել ՊԵԿ-ի հետ յուրաքանչյուր հարցադրման պարզաբանման ուղղությամբ, բայց փոխարենը ՀՀ Պետեկամուտների ծառայությունը գերադասում է գործարարի հետ խոսել վախեցնելու, պարտադրելու վայրի ՀԻՆ մեթոդներով:

Մեր ընկերության հեղինակությանը հասցվել է անդառնալի վնաս, ընկերությանը հասցվել է ֆինանսական ահռելի վնաս, ՊԵԿ-ը իր այս մեթոդներով խաթարում է ընկերության բնականոն գործունեությունը և սպառնալիք ստեղծում ընկերության գոյությանը:

Մենք օրենքի սահմաններում պայքարելու ենք ընկերության տնօրենի՝ կալանքից անհապաղ ազատման համար: Մենք պահանջելու ենք պատասխանատվության ենթարկել այս վայրագության հեղինակներին: Մենք պահանջելու ենք Հայաստանին, մեր ընկերությանը և մեր գործընկերներին հասցված բոլոր վնասների փոխհատուցում: Մենք կոչ ենք անում մեր հայաստանյան և արտասահմանյան բոլոր գործընկերներին և այս վայրագությամբ մտահոգված հանրությանը հանդես գալ ՊԵԿ-ի այս գործելաոճը դատապարտող հայտարարություններով:

ՊԵԿ-ի նման գործողությունը մի մարդու նկատմամբ, ով Նոր Հայաստանում վերջին մեկ տարվա ընթացքում փաստացի կատարել է ավելի քան 90 միլիոն դոլարի ներդրում, ստեղծել է ավելի քան 600 աշխատատեղ և պատրաստվում էր 2019թ-ին կատարել ևս 100 մլն դոլարի ներդրում ու ստեղծել լրացուցիչ 1000 աշխատատեղ արտահանող գյուղատնտեսության ոլորտում, մենք բնութագրում ենք որպես անմտածված վայրագություն և Հայաստանի հեղինակությանը, ներդրումային միջավայրի և տնտեսական անվտանգության դեմ ուղղված քայլ»:

Նշենք՝ Երևան քաղաքի ընդհանուր իրավասության առաջին ատյանի դատարանն այսօր բավարարեց «Սպայկա» ընկերության տնօրեն Դավիթ Ղազարյանին կալանավորելու՝ Պետական եկամուտների կոմիտեի (ՊԵԿ) միջնորդությունը, որի շուրջ 5 ժամ տևած քննությունը կայացել էր ուրբաթ՝ ապրիլի 5-ին:

ՊԵԿ-ի պնդմամբ՝ բեռնափոխադրումներով զբաղվող այս խոշոր ընկերությունը հարկային պարտավորություններից խուսափելով 7 միլիարդ դրամի վնաս է հասցրել պետությանը: «Սպայկա»-ի տնօրենը մեղադրանքը շինծու է որակում:

Պատրաստեց՝ Լիաննա Մարգարյանը