Մինչև 7՝ «քարսիթերով», 7-ից-12-ը՝ ամրագոտիներով և ոչ մի դեպքում՝ մոտոցիկլի հետևի նստատեղին․ երեխաների փոխադրման պահանջները կփոխվեն - RadioVan.fm

Онлайн

Մինչև 7՝ «քարսիթերով», 7-ից-12-ը՝ ամրագոտիներով և ոչ մի դեպքում՝ մոտոցիկլի հետևի նստատեղին․ երեխաների փոխադրման պահանջները կփոխվեն

2019-01-22 18:08 , Общество, 1598

Մինչև 7՝ «քարսիթերով», 7-ից-12-ը՝ ամրագոտիներով և ոչ մի դեպքում՝ մոտոցիկլի հետևի նստատեղին․ երեխաների փոխադրման պահանջները կփոխվեն

Ճանապարհային երթևեկության գործող կանոնները, ճանապարհային նշանները և ճանապարհային գծանշումներն արդի պահանջներին համապատասխանեցնելու անհրաժեշտությամբ պայմանավորված՝ ՀՀ արդարադատության նախարարությունն այսօր իրավական ակտերի հրապարակման միասնական կայքում շրջանառության մեջ է դրել կառավարության նախկին որոշումներում փոփոխություններ կատարելու մասին նախագիծը։

Առաջարկվող փոփոխություններից մեկով՝ մինչև 7 և 7-ից մինչև 12 տարեկան երեխաների փոխադրման համար, տարիքային առանձնահատկությամբ պայմանավորված, կսահմանվեն առանձին պահանջներ (նշյալ տարիքային խմբի փոխադրման համար ներկայում սահմանված են միանման կանոններ, որը, ըստ նախարարության, բավականին դժվարեցնում է դրանց պահպանումը)։

Այսպես՝ մինչև 7 տարեկան երեխաների փոխադրումը թեթև մարդատար ավտոմոբիլում և բեռնատար ավտոմոբիլի խցիկում, որոնց կառուցվածքով նախատեսված է անվտանգության գոտիներ կամ անվտանգության գոտիներ և մանկական պահող համակարգ, պետք է իրականացվի երեխայի քաշին և հասակին համապատասխանող մանկական պահող համակարգերի (սարքերի) («քարսիթերի») օգտագործման միջոցով, իսկ 7-ից մինչև 12 տարեկան երեխաների փոխադրումը թեթև մարդատար ավտոմոբիլում և բեռնատար ավտոմոբիլի խցիկում, որոնց կառուցվածքով նախատեսված է անվտանգության գոտիներ կամ անվտանգության գոտիներ և մանկական պահող համակարգ, պետք է իրականացվի երեխայի քաշին և հասակին համապատասխանող մանկական պահող համակարգերի (սարքերի) օգտագործման միջոցով կամ անվտանգության ամրագոտիների օգտագործման միջոցով, իսկ թեթև մարդատար ավտոմոբիլի առջևի նստատեղում՝ միայն երեխայի քաշին և հասակին համապատասխանող մանկական պահող համակարգերի (սարքերի) օգտագործման միջոցով:

Ի դեպ՝ կարգելվի մինչև 12 տարեկան երեխաներին փոխադրել մոտոցիկլի հետևի նստատեղին, ինչպես նաև բեռնատար ավտոմոբիլի թափքում (բացառությամբ ֆուրգոն թափքով ավտոմոբիլի):

Նախագիծը, նշենք, բաց է դիտողություն-առաջարկների համար մինչև փետրվարի 6-ը։

Նախագծի մանրամասները՝ այստե´ղ։

Պատրաստեց՝ Լիաննա Մարգարյանը

Лента

Рекомендуем посмотреть