Ըստ Freedom House իրավապաշտպան կազմակերպության հրապարակած «Համացանցի ազատությունը 2018 թվականին» զեկույցի՝ Հայաստանը «մասամբ ազատ»-ից տեղափոխվել է «ազատ» երկրների շարքը։ Մեդիափորձագետ Սամվել Մարտիրոսյանը պատճառը պայմանավորում է Հայաստանում տեղի ունեցած թավշյա հեղափոխության հետ:
«Համացանցի առկայությունը հեղափոխության վրա ակնհայտ ազդեց: Կարելի է ենթադրել, որ եթե ինտերնետը չլիներ, գուցե և հեղափոխությունը չհաջողվեր»:
Փորձագետի համոզմամբ՝ առաջիկայում կայանալիք նախընտրական քարոզչության ժամանակ համացանցի դերը կրկին կմեծանա:
«Ինտերնետը հիմնական հարթակն է լինելու: Հատկապես, եթե հաշվի առնենք, որ շատ սեղմ ժամանակում է քարոզարշավը անցնելու»:
Ըստ զեկույցի՝ 86 երկրների շարքում Հայաստանը 27-րդ տեղն է զբաղեցրել: Փորձագետը նշում է, որ որևէ երկրում համացանցի ազատությունը պարզելու համար հաշվի են առնում հետևյալ մեթոդները:
«Հաշվի են առնում մարզերում ինտերնետի հասանելիությունը, գինը, նաև, թե ձերբակալված լրագրողներ կան, կամ լրագրողներին ծեծում են թե ոչ ուղիղ եթերների ժամանակ: Կամ արդյոք կան արգելափակված կայքեր»:
Համացանցի ազատության լավագույն ցուցանիշը դրսևորվել է սկանդինավյան, եվրոպական երկրներում ու Ավստրալիայում: Ամենացածր ցուցանիշը՝ Չինաստանում: