Онлайн
Լեգենդար շանսոնյե Շառլ Ազնավուրի հոգեհանգստի արարողությունը տեղի կունենա հոկտեմբերի 5-ին Փարիզում, Հաշմանդամների տանը:
Այս մասին տեղեկանում ենք «Ազնավուր» հիմնադրամի ֆեյսբուքյան էջից:
Երգչի հուղարկավորության օրը, նշենք, ՀՀ վարչապետ Նիկոլ Փաշինյանի որոշմամբ՝ Հայաստանում սգո օր է հայտարարվել։
Ազնավուրի հուղարկավորության օրը սգո օր կլինի նաև Արցախում։ Այդ մասին «Արցախպրես»-ին հայտնել է նախագահ Բակո Սահակյանի մամուլի քարտուղար Դավիթ Բաբայանը:
ՀՀ նախագահ Արմեն Սարգսյանը և վարչապետ Նիկոլ Փաշինյանը կմասնակցեն աշխարհահռչակ շանսոնյեի հոգեհանգստի և հուղարկավորության արարողություններին։
Հայաստանի Ազգային հերոս Շառլ Ազնավուրը, հիշեցնենք, մահացել է հոկտեմբերի 1-ին՝ 94 տարեկան հասակում։
Փորձաքննության արդյունքներով՝ երգչի մահը վրա է հասել բնական ճանապարհով․ թոքերի այտուցը հանգեցրել է կարդիոռեսպիրատորային անբավարարության, ինչն էլ հանգեցրել է մահվան:
