«Սասնա Ծռեր» կուսակցությունը Փաշինյանին հորդորում է ձեռնպահ մնալ Սիրիայում Ռուսաստանի հետ ասոցացվելուց - RadioVan.fm

Онлайн

«Սասնա Ծռեր» կուսակցությունը Փաշինյանին հորդորում է ձեռնպահ մնալ Սիրիայում Ռուսաստանի հետ ասոցացվելուց

2018-09-17 16:44 , Политика, 1721

«Սասնա Ծռեր» կուսակցությունը Փաշինյանին հորդորում է ձեռնպահ մնալ Սիրիայում Ռուսաստանի հետ ասոցացվելուց

ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի միջև՝ Սիրիայում Ռուսաստանի հետ համատեղ հումանիտար ծրագիր իրականացնելու վերաբերյալ պայմանավորվածության առնչությամբ մտահոգություն է հայտնում Սասնա Ծռեր կուսակցության ստեղծման նախաձեռնող խմբի քարտուղարությունը։

Տարածած հայտարարությունում նշված է․

«Սասնա Ծռեր կուսակցության ստեղծման նախաձեռնող խումբը խիստ մտահոգված է Ռուսաստանի հետ համատեղ հումանիտար ծրագրով ՀՀ մասնագետներին Սիրիա ուղարկելու հանգամանքով:

Թեև հումանիտար ոլորտում Հայաստանի ակտիվ մասնակցությունն առհասարակ ողջունելի երևույթ է, մասնակցության ձևաչափը և գործընկերների ընտրությունը կարող են էապես փոխել դրա բնույթը, իսկ որոշակի դեպքերում՝ նույնիսկ բացասական հետևանքներ ունենալ Հայաստանի շահերի և միջազգային վարկի համար:

Ռուսաստանը Հայաստանի նկատմամբ ունի ակնհայտ գաղութատիրական նկրտումներ: Բացի այդ, Ռուսաստանը միջազգային հանրության շրջանում փաստագրված է որպես ոչ ժողովրդավարական և մարդու իրավունքները չհարգող, ինչպես նաև ուրիշ պետությունների գործերին կոպիտ ու ագրեսիվ կերպով միջամտող պետություն, ինչի համար հիմք են ծառայել նաև Սիրիայում Ռուսաստանի վարած քաղաքականությունը և ռազմական ձեռնարկումները:

Միևնույն ժամանակ՝ Միջին Արևելքը (նրա մեջ նաև Սիրիան), խճողված շահերի բարդ և նուրբ կծիկ է, որտեղ Հայաստանը և հայությունը շատ անելիք ունեն, սակայն որևէ քայլ կատարելիս պետք է առաջին հերթին նկատի առնել այն հրամայականը, որ պետք է ամեն կերպով խուսափել թշնամիներ վաստակելուց և մեր պետական ու ազգային շահերին վնասելուց:

Մինչդեռ Ռուսաստանը Միջին Արևելքում, այդ թվում՝ Սիրիայում, ունի բազմաթիվ հակառակորդներ և նրա հետ միասին որևէ գործողություն կատարելը հղի է Հայաստանին նույնպես թիրախավորելու սպառնալիքով:

Վերոհիշյալի հաշվառմամբ, ՀՀ Վարչապետին հորդորում ենք առհասարակ ձեռնպահ մնալ Ռուսաստանի ծավալապաշտական քաղաքականության հետ ասոցացվելու վտանգ պարունակող նմանաբնույթ գործողություններին մասնակցելուց և այդ հիմքով դադարեցնել նրա հետ Սիրիայում այսպես կոչված համատեղ հումանիտար ծրագիր իրականացնելու նախաձեռնությունից»:

Հիշեցնենք՝ սեպտեմբերի 8-ին մոսկվա կատարած այցի ընթացքում Նիկոլ Փաշինյանը և Վլադիմիր Պուտինը պայմանավորվել են Սիրիայում մարդասիրական համատեղ գործողության մասին, որի շրջանակում Հայաստանը Սիրիա կուղարկի ռազմականսակրավորների, ինժեներների և բժիշկների։ Վարչապետը լրագրողների հետ զրույցում նշել էր՝ հիմնական խնդիրը Հալեպի հայ համայնքին և, ընդհանուր առմամբ, Սիրիային օգնություն ցուցաբերելն է։ ՊՆ մարդասիրական առաքելության ներկայացուցիչները, վարչապետ Փաշինյանի տեղեկացմամբ, Սիրիայում գործելու են Հայաստանի դրոշի ներքո։

Պատրաստեց՝ Լիաննա Մարգարյանը

Лента

Рекомендуем посмотреть