ՀՀ քննչական կոմիտեում ստացվել և վարույթ է ընդունվել ՀՀ ազգային անվտանգության ծառայության տնօրեն Արթուր Վանեցյանի և ՀՀ հատուկ քննչական ծառայության պետ Սասուն Խաչատրյանի միջև տեղի ունեցած հեռախոսազրույցի գաղտնիությունը խախտելու՝ այն ձայնագրելու և տարածելու դեպքի առթիվ ՀՀ գլխավոր դատախազությունում՝ ՀՀ քրեական օրենսգրքի 146-րդ հոդվածի 1-ին մասի և 254-րդ հոդվածի 3-րդ մասի 4-րդ կետի հատկանիշներով հարուցված քրեական գործը։ Այդ մասին հայտնում են ՀՀ քննչական կոմիտեից։
Հաղորդվում է, որ ՀՀ ՔԿ նախագահի կողմից նախաքննության կատարումը հանձնարարվել է ՀԿԳ քննության գլխավոր վարչությանը։ Ստեղծվել է քննչական խումբ, և օպերատիվ-հետախուզական մարմինների հետ համատեղ ձեռնարկվում են անհրաժեշտ միջոցառումներ՝ դեպքի բոլոր հանգամանքները, ենթադրյալ հանցագործություն կատարած անձանց շրջանակը պարզելու ուղղությամբ։
«Քննության շահերից ելնելով՝ այլ մանրամասներ քննության այս փուլում հրապարակման ենթակա չեն»,-նշվում է Քննչական կոմիտեի տարածած հաղորդագրությունում։
Հիշեցնենք՝ նախօրեին համացանցում հայտնվեց ՀՔԾ պետ Սասուն Խաչատրյանի ու ԱԱԾ տնօրեն Արթուր Վանեցյանի միջև տեղի ունեցած հեռախոսային խոսակցության գաղտնալսված ձայնագրությունը, որում պաշտոնյաները քննարկում են «Մարտի 1»-ի գործի վերաբերյալ մանրամասներ՝ շոշափելով ՀՀ երկրորդ նախագահ Ռոբերտ Քոչարյանին կալանավորելու, ՀԱՊԿ քարտուղար Յուրի Խաչատուրովին կալանավորելու վտանգի և այդ շրջանակում այլ հարցեր։
Ժամեր անց ՀՀ վարչապետ Նիկոլ Փաշինյանի հանձանարարականով՝ Արթուր Վանեցյանը և Սասուն Խաչատրյանը հրատապ մամլո ասուլիսով հանդես եկան՝ հաստատելով, որ համացանցում տարածված ձայնագրությունում զրուցում են իրենք։ Պաշտոնյաների գնահատմամբ՝ դա «Մարտի 1-ի» բացահայտմանը խոչընդոտելու «խղճուկ փորձ» է։
«Ոմանք ուզում են ճողոպրել պատասխանատվությունից, ես դա թույլ չեմ տա»,-իր հերթին հայտարարեց Նիկոլ Փաշինյանը։
Պատրաստեց՝ Լիաննա Մարգարյանը