Երկարատև հիվանդությունից հետո 80 տարեկանում կյանքից հեռացել է ռուս հայտնի մանկագիր Էդուարդ Ուսպենսկին:
«РЕН ТВ» հեռուստաալիքի հաղորդմամբ՝ Ուսպենսկին մահացել է Մոսկվայի Տրոիցկի վարչական օկրուգում գտնվող Պուչկովո գյուղում:
Վերջին տարիներին գրողի մոտ չարորակ ուռուցք էր հայտնաբերվել և նա պայքարում էր այդ հիվանդության դեմ: Գերմանիայում բուժվելուց հետո այս տարվա օգոստոսի սկզբին Ուսպենսկին վերադարձել էր Մոսկվա, ուր և օգոստոսի 9-ին նրա ինքնազգացողությունը կտրուկ վատացել է, գրողը կորցրել է գիտակցությունն ու մահացել։
Էդուարդ Ուսպենսկին ծնվել է 1937 թվականի դեկտեմբերի 22-ին՝ Եգորևսկում (Մոսկվայի շրջան)։ Կրթություն ստանալով Մոսկվայի ավիացիոն ինստիտուտում և դառնալով ինժեներ՝ Ուսպենսկին, այդուհանդերձ, իր ապրուստի մասին հոգացել է մուլտֆիլմերի համար սցենարներ և հերոսներ ստեղծելով։ Մանկական գրքերից բացի նա գրել է թատերական տեքստեր և բանաստեղծութուններ:
Հայտնի և սիրված մանկագիրը ստեղծել Է բազմաթիվ հանրաճանաչ հերոսներ՝ կոկորդիլոս Գենային և Չեբուրաշկային, «Պրոստոկվաշինա» մուլտֆիլմի հերոներին՝Մատրոսկին կատվին, փոստատար Պեչկինին և Շարիկ շանը, Քեռի Ֆյոդորին:
Ընդհանուր առմամբ, գրողի սցենարներով և ստեղծագործություններով նկարահանվել Է 60 մուլտֆիլմ:
Ուսպենսկին հեղինակն է նաև մի շարք մանկականհեռուստահաղոդումների, այդ թվում՝ «Բարի գիշեր, երեխաներ» («Спокойной ночи, малыши»)։