Օրեր անց Երևանի Քանաքեռ-Զեյթուն համայնքում կկայանա «Հայ-չինական բարեկամության դպրոց»-ի պաշտոնական բացման արարողությունը: Դպրոցի շինարարությունն իրականացվել է Հայաստանի և Չինաստանի կառավարությունների միջև կնքված տեխնիկատնտեսական համագործակցության մասին համաձայնագրի շրջանակներում:
Ինչպես այսօր լրագրողների հետ ճեպազրույցում ասել է ՀՀ արտաքին գործերի նախարարության մամուլի խոսնակի ժամանակավոր պաշտոնակատար Աննա Նաղդալյանը՝ դպրոցն իր գործունեությամբ գալու է համալրելու իր արդյունավետությունն ապացուցած Կոնֆուցիուսի ինստիտուտի գործունեությունը:
«Հայաստանը բարձր է գնահատում ՉԺՀ կառավարության կողմից անհատույց օգնության ծրագրերի շրջանակներում մեր երկրին տրամադրվող աջակցությունը»,-ասել է արտաքին գերատեսչության ներկայացուցիչը՝ միաժամանակ հայտնելով, որ օրերս ավարտին է հասցվելու Հայաստանին 200 շտապ օգնության ավտոմեքենաների տրամադրման ծրագիրը, որի մեկնարկը տրվել էր նախորդ տարվա մայիսին՝ ՀՀ ԱԳՆ-ում Հայաստանի և Չինաստանի կառավարությունների միջև ստորագրված տեխնիկատնտեսական համագործակցության մասին հերթական համաձայնագրի շրջանակներում:
Շտապօգնության մեքենաների առաջին խմբաքանակը Երևանում է։ Այդ մասին այսօր ֆեյսբուքյան ուղիղ եթերում հայտնել է ՀՀ առողջապահության նախարար Արսեն Թորոսյանը․
Պատրաստեց՝ Լիաննա Մարգարյանը