Онлайн
Այսօր ՀՀ սահմանադրության օրն է։ Երկրի Մայր օրենքն ընդունվել է 1995թ. հուլիսի 5-ին` համաժողովրդական հանրաքվեի արդյունքում:
Սահմանադրությունն ամրագրեց ՀայաստանիՀանրապետության՝ որպես ինքնիշխան, ժողովրդավարական, իրավական և սոցիալական պետություն լինելու բնույթը, հռչակեց քաղաքացու հիմնարար իրավունքներն ու ազատությունները, սահմանեց հանրապետության կառավարման ձևը՝ հիմնված օրենսդիր, գործադիր և դատական իշխանությունների տարանջատման սկզբունքի վրա:
Հայաստանի Սահմնադրությունն ընդունման օրից ի վեր երկու անգամ փոփոխության է ենթարկվել՝ 2005 և 2015 թվականներին:
2015-ի փոփոխություններով՝ Հայաստանը անցում կատարեց կիսանախագահականից խորհրդարական կառավարման Հանրապետության։
1995-ին Սահմանադրության ընդունումից հետո հուլիսի 5-ը ներառվեց պետական տոների ցուցակում՝ դառնալով ոչ աշխատանքային օր։
Սահմանադրության օրվա առթիվ շնորհավորական ուղերձ է հղել ԱԺ նախագահ Արա Բաբլոյանը։
«Սիրելի հայրենակիցներ,
շնորհավորում եմ Հայաստանի Հանրապետության պետական կարեւորագույն տոներից մեկի` Սահմանադրության օրվա առթիվ: Քսաներեք տարի առաջ մենք ազատ կամարտահայտմամբ ընդունեցինք հայոց նորանկախ պետականության ամրապնդման համար բացառիկ նշանակություն ունեցող մի փաստաթուղթ, որն ամփոփեց երրորդ հազարամյակի շեմին ինքնիշխան, ժողովրդավարական, սոցիալական, իրավական պետություն կերտելու մեր երազանքը:
Հայ ժողովուրդն իր բարձր իրավագիտակցությամբ պայմանավորված որոշումը վավերացրեց դժվարին մի ժամանակներում, երբ հազիվ մեկ տարի առաջ էին լռել հրանոթների որոտները, իսկ խաղաղությանն ուղղված իրական սպառնալիքներն ավելի շատ էին, քան կայուն զարգացման դեռ փխրուն երաշխիքները:
Հայաստանի Հանրապետության Մայր օրենքի ընդունումը կանխորոշեց մեր պետության հետագա ընթացքն ու զարգացման ուղին: Անկախ պետականություն կառուցելու տարբեր հանգրվաններում այն երկու անգամ ենթարկվեց փոփոխությունների եւ փայլուն կատարելով իր պատմական առաքելությունը` միշտ մնաց բոլոր տեսակի իրավահարաբերությունների կարգավորման հիմքը, իսկ իրավական հարթությունում դարձավ մեր ինքնիշխանության մշտարթուն պահապանը:
Եւ այսօր յուրաքանչյուրիս իրավունքների ազատ իրացումով ու պարտականությունների պատշաճ կատարումով է պայմանավորված պետական եւ հասարակական կյանքում Սահմանադրության անառարկելի գերակայության հաստատումն ու լիարժեք կիրառումը: Իսկ այն բոլոր ասպարեզներում Հայաստանի կայուն զարգացման կարեւորագույն նախապայմանն է:
Հայաստանի Հանրապետության Սահմանադրությունը գրեթե քառորդ դար շարունակ փարոսի լույսի պես մեզ առաջնորդում է անկախ ու ժողովրդավարական պետություն ստեղծելու դժվարին ճանապարհով: Եւ մենք էլ պիտի աչքի լույսի պես փայփայենք այն, ինչպես մեր պետական խորհրդանիշները, որոնց օրը նույնպես նշում ենք այսօր:
Եւս մեկ անգամ շնորհավորելով Սահմանադրության օրվա առթիվ` բոլորիս մաղթում եմ խաղաղություն, առողջություն, երջանկություն եւ բարեկեցություն»,-ասված է խորհրդարանի նախագահի շնորհավորական ուղերձում:
