Ինչպես է Նախիջևանում այրվում ադրբեջանական դիրքը

ՀՀ պաշտպանության նախարարության մամուլի խոսնակ Արծրուն Հովհաննիսյանը ֆեյսբուքյան իր էջում հրապարակել է տեսանյութ, որում երևում է, թե ինչպես է այրվում Նախիջևանում ադրբեջանական դիրքը:

Նշենք՝ երեկ՝ հուլիսի 1-ին, Արծրուն Հովհաննիսյանը հայտնել էր, որ ադրբեջանական ԶՈւ-երը նախիջևանյան ուղղությամբ որոշ տեղամասերում փորձել են դիրքային ամրապնդման ինժեներական աշխատանքներ իրականացնել, ինչին ի պատասխան ՀՀ ԶՈւ-երը պատասխան կրակ են բացել և թույլ չեն տվել հակառակորդին կատարել իր խնդիրը:

Պաշտպանական գերատեսչության մամլո խոսնակն ընդգծել էր, որ հայկական կրակից ամբողջությամբ ավերվել ու այլրվել է հակառակորդի դիրքերից մեկը: Փոխհրաձգության ընթացքում թեթև (աննշան) վիրավորում է ստացել ՀՀ ԶՈՒ-երի պայմանագրային զինծառայող, 1974 թ. Վահագն Սամվելի Բաղդասարյանը:

Նախորդ շաբաթ, նշենք, Ադրբեջանի պաշտպանության նախարարությունը տեսանյութ հրապարակեց՝ հայտարարելով, թե շուրջ 11 հազար հեկտար հայկական տարածք է գրավել, տեղակայել նոր դիրքեր, դրանց համար կառուցել 50 կմ ճանապարհ՝ նշանառության տակ պահելով հայկական մի շարք համայնքներ, վարելահողեր։ Մինչդեռ, հայկական կողմի պնդմամբ, Ադրբեջանի առաջխաղացումը բացառապես սեփական տարածքում է եղել և հայկական գյուղերը անհասանելի են Ադրբեջանի հրաձգային զինատեսակների համար։

ՀՀ արտաքին գործերի նախարարության մամուլի խոսնակ Տիգրան Բալայանը մայիսի 22-ին լրագրողների հետ ճեպազրույցում անդրադառնալով հայ-ադրբեջանական սահմանի նախիջևանյան հատվածում եղած տեղաշարժերին՝ նշել էր, որ այդ մասին Հայաստանը ներկայացրել է ՀԱՊԿ-ին՝ ընդգծելով, որ այդ ամենը կարող է բերել լարման:

Պատրաստեց՝ Լիաննա Մարգարյանը