Онлайн

«Չգիտեմ էլ՝ ոնց արտահայտեմ իմ սերը դեպի Արարատը, ես դրանով եմ ապրում». բիբլիականը՝ 67-ամյա լուսանկարչի աչքերով  

2018-05-22 17:31 , Культура, Шоу бизнес, 1473

«Չգիտեմ էլ՝ ոնց արտահայտեմ իմ սերը դեպի Արարատը, ես դրանով եմ ապրում». բիբլիականը՝ 67-ամյա լուսանկարչի աչքերով

«Հեռու ու մոտ բիբլիական Արարատ». այս խորագրով «Նարեկացի» արվեստի միությունում բացվել է Անուշավան Վարդանյանի լուսանկարների ցուցահանդեսը, որը լուսանկարչի բազմամյա գործունեության անդրանիկ ցուցադրությունն է (Անուշավանը նկարել սկսել է 8 տարեկանից «smena» ֆոտոխցիկով):

Առանցքում՝ Հայաստանի խորհրդանիշ Արարատ լեռն է՝ տարվա բոլոր եղանակներին ու ժամերին, բոլոր հնարավոր, երբեմն էլ՝ անհանարին վայրերից, որտեղից Անուշավանի լուսանկարչական օբյեկտիվը կարողացել է որսալ բիբլիական ձյունագագաթը:

«Եթե ՀՀ մշակույթի արդեն նախկին նախարար Արմեն Ամիրյանը չլիներ, երևի թե, այս ցուցահանդեսն այդպես էլ իրականություն չդառնար»,-«Ռադիո Վան»-ի թղթակցի հետ զրույցում ասել է լուսանկարների հեղինակը՝ պատմելով, որ երբ Ամիրյանը տեսել է իր աշխատանքները՝ հարցրել է, թե ինչու՞ ցուցահանդես չի անում՝ առաջարկելով, որ անպայման անի:

«Ես էլ որոշեցի ու արեցի»,-ժպտում է լուսանկարիչը, ով նկարելիս երբեք չի մտածել, որ ցուցադրելու է դրանք, ուղղակի, իր բնորոշմամբ, Արարատը նկարելիս հոգու հանգստություն է զգացել, ամեն անգամ նորովի բացահայտելով իր սիրուն:

«Չգիտեմ էլ՝ ոնց արտահայտեմ իմ սերը դեպի Արարատը, ես դրանով եմ ապրում»,-անկեղծանում է 67-ամյա Անուշավան Վարդանյանը՝ նշելով, որ մշուշն ու մառախուղը երբեմն իրեն զրկում են գեղեցկուհուն տեսնելու ու անմահացնելու վայելքից. «Եղել են օրեր, երբ գնացել եմ նկարելու, մշուշապատ է եղել, նորից հետ եմ վերադարձել»:

Պատմում է՝ «Ամեն առավոտ տանից դուրս եմ գալիս, նայում եմ. եթե այդ օրը լավ երևում է՝ հնարավորինս արագ արդեն այնտեղ եմ: Կյանք է, էլի, ամեն մեկը մեկին է սիրում, ես էլ՝ էս եմ սիրում»:

Բիբլիական ձյունագագաթը տեսնելու ու լուսանկարելու համար բոլոր հնարավոր և անհնավանական ճանապարհներն անցած լուսանկարիչը դժվարանում է բառերով ասել, թե ինչ է իր համար Արարատը, ինչ է խորհրդանշում, սակայն ցանկությունն է, որ ամբողջ աշխարհը տեսնի այն:

Անուշավանի ֆոտոխցիկը որսացել է Արարատ լեռն արտացոլող 1000-ից ավելի կադրեր, սակայն ցուցահանդեսում, սրահի փոքր լինելու պատճառով, ներկայացված է մոտ երեք տասնյակը:

Նշենք, որ ցուցահանդեսի բացմանը ներկա էին լուսանկարչի ընկերները, արվեստասերները, իսկ միջոցառման երաժշտական մասը հիանալի կատարումներով ապահովեց «Նարեկացի» արվեստի միության «Նովա» ժողովրդական նվագարանների անսամբլը (գեղարվեստական ղեկավար՝ ՀՀ մշակույթի վաստակավոր գործիչ, թառահար Հովիկ Սահակյան):

Անուշավան Վարդանյանի լուսանկարները բաց են ցուցադրության մինչև մայիսի 26-ը:

Հեղինակ՝ Լիաննա Մարգարյան

Лента

Рекомендуем посмотреть