Հոկտեմբերի 27-ի ահաբեկչությունը հարձակում էր ՀՀ ինքնիշխանության, ժողովրդի կողմից ընտրված իշխանության դեմ․ Փաշինյանը՝ 23 տարի առաջ կատարվածի մասին

Այսօր լրանում է 1999 թվականի հոկտեմբերի 27-ի ահաբեկչության 23-րդ տարելիցը:

Հիշեցնենք՝ այդ օրը Ազգային ժողովում (ԱԺ) կառավարության հետ հարց ու պատասխանի ժամանակ զինված հարձակման հետևանքով սպանվեցին Հայաստանի վարչապետ Վազգեն Սարգսյանը, Ազգային ժողովի նախագահ Կարեն Դեմիրճյանը, փոխխոսնակներ Յուրի Բախշյանը ու Ռուբեն Միրոյանը, օպերատիվ հարցերով նախարար Լեոնարդ Պետրոսյանը, պատգամավորներ Հենրիկ Աբրահամյանը, Արմենակ Արմենակյանը և Միքայել Քոթանյանը:

Զինված հարձակման գլխավոր մեղավորները՝ Նաիրի Հունանյանի գլխավորությամբ, ցմահ դատապարտվեցին: Նրանք տված ցուցմունքներում պնդում էին, թե իրենց արարքը «հայրենասիրական» միտումներով է, «պահանջված ժողովրդի կողմից», քանի որ «սպեկուլյանտ կառավարությունը խմում է ժողովրդի արյունը»։

ՀՀ վարչապետ Նիկոլ Փաշինյանը կառավարության այսօրվա նիստում 23 տարի առաջ կատարված ահաբեկչությունը որակել է հարձակում Հայաստանի Հանրապետության (ՀՀ), նրա ինքնիշխանության և անկախության, ժողովրդի կողմից ընտրված իշխանության դեմ։

Նա նիստին ներկա գտնվողներին խնդրել է մեկ րոպե լռությամբ հարգել ահաբեկչության զոհերի հիշատակը։