Онлайн
«Եռաբլուր» զինվորական պանթեոնում այսօր զոհված զինծառայողների հարազատներին բիրտ ուժով բերման ենթարկելու փաստի առնյչությամբ ՀՀ մարդու իրավունքների պաշտպանը (ՄԻՊ) հայտարարություն է տարածել, որում ասված է․
«Այսօր՝ առավոտյան, Եռաբլուր պանթեոնում ոստիկանության ծառայողների կողմից զոհված զինծառայողների ծնողների և այլ քաղաքացիների վարչական ձերբակալման կապակցությամբ Մարդու իրավունքների պաշտպանի աշխատակազմից իրականացվել է արագ արձագանքում, կապ է հաստատվել Ոստիկանության համապատասխան բաժիններ վարչական ձերբակալման ենթարկված անձանց իրավունքների իրացումն ապահովելու նպատակով։
Պաշտպանն արձանագրում է, որ ցանկացած դեպքում, և հատկապես նման զգայուն և հուզական գերլարված իրավիճակներում, Ոստիկանության ծառայողները պետք է գործեն խիստ համաչափ և զերծ մնան ֆիզիկական նման ներգործությունից։ Հակառակն անընդունելի է։
Տեղի ունեցածի վերաբերյալ Պաշտպանի աշխատակազմում սկսվել է ուսումնասիրություն, և դրա շրջանակում Պաշտպանը հանգամանալից պարզաբանումներ կպահանջի Ոստիկանությունից, այդ թվում առանձին ծառայողների գործողությունների վերաբերյալ»։
Նշենք՝ ՀՀ ոստիկանությունը հայտնել է, որ պետի հանձնարարությամբ «Եռաբլուր»-ում իրավապահների գործողություններն ուսումնասիրվում են, և հանրությունը կիրազեկվի արդյունքների մասին:
