Онлайн
Այսօր գործադիրի նիստում հաստատման է ներկայացվել «Կառավարության կառուցվածքի և գործունեության մասին» օրենքի նախագիծը, ըստ որի կառավարության նիստերի անցկացման նոր կարգ է սահմանվում՝ սահմանափակելով լրագրողների ներկայությունը նիստերին (խմբ.- ներկայում լրագրողները հետևում են կառավարության նիստերին իրենց համար առանձնացված սրահում տեղադրված մոնիտորների միջոցով, փակ են միայն օրակարգում ներառված գաղտնի հարցերի քննարկումները):
Համաձայն նախագծում առաջարկվող նոր տարբերակի՝ կառավարության նիստերը դռնփակ են լինելու: Վարչապետի որոշմամբ նիստի մի մասը կարող է անցկացվել դռնբաց: Կառավարության անդամն իրավունք չի ունենալու առանց վարչապետի թույլտվության տեղեկատվություն հրապարակել Կառավարությունում քննարկված որևէ հարցի քննարկման ընթացքի մասին:
Անփոփոխ են թողնված կառավարության նիստերի անցկացման կարգի հետևյալ պահանջները՝
Կառավարության նիստերը հրավիրում և վարում է վարչապետը,
Կառավարության նիստերը, որպես կանոն, հրավիրվում են շաբաթը մեկ անգամ,
Կառավարության անդամները պարտավոր են մասնակցել Կառավարության նիստերին և նիստերից կարող են բացակայել վարչապետի համաձայնությամբ:
Հստակեցված է՝
Կառավարության նիստերին ներկա գտնվելու իրավունք ունեն Հանրապետության նախագահի աշխատակազմի ղեկավարը, Ազգային ժողովի աշխատակազմի ղեկավարը, վարչապետի աշխատակազմի ղեկավարը, պետական եկամուտների, քաղաքաշինության, միջուկային անվտանգության կարգավորման, վիճակագրական կոմիտեների և վարչապետին ենթակա մարմինների ղեկավարները, վարչապետի մամուլի քարտուղարը, ինչպես նաև վարչապետի կողմից հրավիրված այլ անձինք:
