Онлайн
Արցախը Հայաստանին կապող միջպետական մայրուղու Շուշի-Բերձոր-Գորիս ճանապարհահատվածը կգործի մինչև ս.թ. օգոստոսի 31-ը ներառյալ։
Այդ մասին հայտնում է Արցախի Հանրապետության (ԱՀ) ներքին գործերի նախարարությունը (ՆԳՆ)՝ ընդգծելով, որ նշված ժամանակահատվածում Արցախի Հանրապետություն մտնող և դեպի Հայաստանի Հանրապետություն ելք կատարող քաղաքացիների ազատ ու անվտանգ երթևեկությունը կապահովեն ռուս խաղաղապահները:
Ի հավելումն ասվում է, որ ՆԳ նախարարությունն այլընտրանքային նոր ճանապարհի վերաբերյալ կտրամադրի հավելյալ տեղեկություն։
Հիշեցնենք՝ օգոստոսի սկզբին Ադրբեջանը ռուս խաղաղապահների միջոցով վերջնագիր էր ներկայացրել Հայաստան-Արցախ երթևեկությունը Լաչինի փոխարեն առաջիկայում նոր երթուղով կազմակերպել, ըստ էության՝ հանձնել Բերձորն ու հարակից երկու գյուղերը՝ Սոսն ու Աղավնոն։ Օգոստոսի 5-ին Աղավնոյի բնակիչների հետ հանդիպմանը Արցախի տարածքային կառավարման նախարար Հայկ Խանումյանը տեղեկացրել էր, որ մինչև օգոստոսի 25-ը նրանք պետք է հեռանան գյուղից։ Թեև նշենք՝ ՀՀ արտգործնախարարությունը տարածած հաղորդագրությամբ՝ անթուլյատրելի էր համարել Բաքվի այդ պահանջը՝ ընդգծելով, որ փորձ է արվում միակողմանիորեն փոփոխել Լաչինի միջանցքում եռակողմ հայտարարության 6-րդ կետով սահմանված իրավական ռեժիմը, ըստ որի՝ այդ միջանցքով անցնող երթուղին կարող է փոփոխվել միայն հայտարարությունը ստորագրած երեք երկրների ձևաչափով հաստատված պլանի համաձայն, որպիսին, ընդգծել էին արտգործնախարարությունից, մինչ օրս չկա։ Այս ամենի ֆոնին՝ Արցախի քաղաքաշինության նախարար Արամ Սարգսյանը օգոստոսի 17-ին հայտնել էր, որ Հայաստանն Արցախին կապող ժամանակավոր ճանապարհի շինարարությունը սկսվել է, ու որ մինչև օգոստոսի 25-ը, հնարավոր է էլ ավելի շուտ, աշխատանքը կավարտեն: 4,7 կիլմոտրանոց հողային ժամանակավոր ճանապարհը շրջանցում է Բերձորն ու Աղավնոն ու Սյունիքի Կոռնիձորի վարչական տարածքով միանում Հագարի գետի վրա ադրբեջանցիների կառուցած կամրջին:
Ի դեպ՝ այսօր Ադրբեջանի նախագահ Իլհամ Ալիևը Twitter-ի իր էջում հայտնել է, որ Ադրբեջանը հսկողության տակ է վերցրել «Լաչին ավանը, Զաբուխ (Աղավնո) և Սուս գյուղերը»:
«Այսօր մենք՝ ադրբեջանցիներս, վերադարձանք Լաչին քաղաք, ադրբեջանական բանակը տեղակայվել է Լաչինում: Զաբուխ և Սուս գյուղերը հսկողության տակ են»,-գրել է Ալիևը:
