Էստոնիայի խորհրդարանի խոսնակի Շուշի կատարած այցը ծայրահեղ մտահոգիչ է․ Սիմոնյանը՝ դեսպանին

Հայաստանի Ազգային ժողովի (ԱԺ) նախագահ Ալեն Սիմոնյանն այսօր Հայաստանում Էստոնիայի դեսպան Ռինա Կալյուրանդի հետ հանդիպմանը ծայրահեղ մտահոգիչ է որակել Էստոնիայի խորհրդարանի խոսնակ Յուրի Ռատասի Շուշի կատարած այցը։

Սիմոնյանը շեշտել է՝ հայաթափված Շուշիում Ռատասի կողմից արված հայտարարությունները ոչ միայն չեն արտացոլում Հայաստանի և Էստոնիայի միջև առկա բարեկամական հարաբերությունների շունչը, այլև հակասում են Էստոնիայի պաշտոնական աջակցությանը ԵԱՀԿ Մինսխի խմբի համանախագահության շրջանակում Լեռնային Ղարաբաղի հակամարտության խաղաղ կարգավորմանը:

ԱԺ պաշտոնական կայքի փոխանցմամբ՝ նա տեղեկացրել է դեսպանին, որ այդ կապակցությամբ նամակ է հղել Էստոնիայի խորհրդարանի խոսնակին, որում բացատրել է հակամարտության էությունը և 2020-ի աղետալի պատերազմի հետևանքները:

ՀՀ ԱԺ նախագահը հույս է հայտնել, որ էստոնացի գործընկերն առաջիկայում կայցելի Հայաստան և տեղում կծանոթանա իրավիճակին, նաև կհանդիպի Լեռնային Ղարաբաղը ներկայացնող պաշտոնյաների հետ:

Էստոնիայի դեսպանը հույս է հայտնել, որ առաջիկայում հնարավորություն կընձեռվի Էստոնիայի խորհրդարանի խոսնակի հետ քննարկելու առաջացած բոլոր հարցերը:

Հիշեցնենք՝Էստոնիայի խորհրդարանի խոսնակ Յուրի Ռատասը Շուշի է այցելել այս տարվա մայիսի 24-ին։ Ադրբեջանական լրատվամիջոցները գրել էին, որ նրան ներկայացվել են Շուշիում իրականացվող «վերականգնողական աշխատանքները»։