Онлайн
ԵԱՀԿ Մինսկի խմբի ամերիկացի համանախագահն այսօր շփվել է իր գործընկերների հետ, որպեսզի քննարկի Լեռնային Ղարաբաղի (ԼՂ) ապագան: Այս մասին տեղեկանում ենք ԱՄՆ պետքարտուղարության Եվրոպայի և Եվրասիայի հարցերով բյուրոյի Twitter-յան գրառումից, որում, միաժամանակ նշվում է, որ ռուս համանախագահը չի ընդունել հրավերը։
«Ցավալի է, որ ռուս համանախագահը չընդունեց հրավերը։ Մենք անհամբեր սպասում ենք Մինսկի խմբի շարունակական աշխատանքին»,-ասված է հրապարակման մեջ։
The U.S. OSCE Minsk Group Co-Chair spoke with her counterparts today to discuss the future of Nagorno-Karabakh. It's unfortunate the Russian Co-Chair did not accept the invitation. We look forward to the Minsk Group’s continuing work.
— DoS Europe and Eurasia (@StateEUR) June 27, 2022
Հիշեցնենք՝ ռուս-ուկրաինական պատերազմի ֆոնին Ռուսաստանի արտաքին գործերի նախարար Սերգեյ Լավրովը դեռ ապրիլի 8-ին, Մոսկվայում Հայաստանի Հանրապետության (ՀՀ) արտաքին գործերի նախարար Արարատ Միրզոյանի հետ համատեղ մամլո ասուլիսում լրագրողի խնդրանքով անդրադառնալով ԵԱՀԿ Մինսկի խմբի համանախագահների հետագա գործունեությանը, հայտարարել էր, որ ԵԱՀԿ Մինսկի խմբի համանախագահները՝ «ամերիկացի և ֆրանսիացի գործընկերները», ռուսատյացության տենդով տարված, հրաժարվել են համագործակցել Ռուսաստանի հետ այդ ձևաչափում։ Իսկ օրեր առաջ Բաքու կատարած այցի ընթացքում Լավրովը հայտարարել էր, որ «ԵԱՀԿ Մինսկի խումբը դադարեցրել է իր գործունեությունը ԱՄՆ-ի և Ֆրանսիայի նախաձեռնությամբ»։
Իգոր Խովաևը, որը Մինսկի խմբում ռուսաստանցի համանախագահն էր, նոր պաշտոն է ստանձնել, նա այժմ Ռուսաստանի հատուկ ներկայացուցիչն է ՀՀ-ի և Ադրբեջանի հարաբերությունների կարգավորմանն աջակցելու հարցով։
Հավելենք՝ ի հեճուկս Ադրբեջանի հայտարարությունների, թե ԵԱՀԿ Մինսկի խումբն այլևս անելիք չունի, քանի որ Ղարաբաղի հակամարտությունը լուծված է և Բաքուն «կկասեցնի» ղարաբաղյան հակամարտությամբ զբաղվելու ԵԱՀԿ Մինսկի խմբի փորձերը, ու որ, այն կարող է աջակցել Հայաստանի և Ադրբեջանի միջև խաղաղ համաձայնագրի նախապատրաստմանը, Հայաստանի իշխանությունները պնդում են, որ Ղարաբաղյան խնդիրը դեռ լուծված չէ, և ԵԱՀԿ Մինսկի խմբի լուծարաման մասին գնահատականները հիմնավորված չեն:
