Զոհված զինծառայողներին տուժող, իսկ նրանց ծնողներին տուժողի իրավահաջորդ ճանաչելու միջնորդությունը բավարարվել է, Փաշինյանին որպես մեղադրյալ ներգրավելն էլ կքննարկվի․ Դատախազություն

ՀՀ գլխավոր դատախազությունից հայտնում են, որ նախօրեին՝ ապրիլի 26-ին, ստացվել է 2020թ. Ադրբեջանի կողմից սանձազերծված պատերազմի ընթացքում զոհված զինծառայողներին քրեական գործով որպես տուժող ճանաչելու վերաբերյալ զոհված զինծառայողների մի շարք ծնողների, հարազատների միջնորդությունը, որը բավարարվել է:

Դատախազությունից նշում են, որ, մասնավորապես, նկատի ունենալով, որ ՀՀ պաշտպանության նախարարության ռազմական վերահսկողության ծառայության նախկին պետ Մովսես Հակոբյանի հարցազրույցի հիման վրա ՀՀ ՀՔԾ-ում 2020թ. նոյեմբերի 21-ին ՀՀ քրեական օրենսգրքի 308-րդ հոդվածի 2-րդ մասով հարուցված, ինչպես նաև դրան միացված՝ Արա Զոհրաբյանիհաղորդման հիման վրա հարուցված քրեական գործով քննության առարկա ենպատերազմից առաջ և դրա ընթացքում ՀՀ բարձրաստիճան պաշտոնատար անձանց կողմից հնարավոր կատարված այնպիսի արարքներ, որոնք բացասական նշանակություն են ունեցել զինված ուժերի մարտունակության հարցում և ազդել պատերազմի արդյունքի վրա, իսկ դատավարության մասնակից ճանաչելու վերաբերյալ ստացված պահանջի համաձայն՝ դրան կից ցուցակում նշված անձինք զոհվել են Արցախում տեղի ունեցած պատերազմի ընթացքում՝ քրեական վերոնշյալ գործով հսկողություն իրականացնող դատախազը գրավոր ցուցում է տվել վարույթն իրականացնող մարմնին (ՀՀ հակակոռուպցիոն կոմիտեի քննիչին) զոհված զինծառայողներին ճանաչել տուժող, իսկ պահանջ ներկայացրած նրանց ծնողներին, հարազատներին՝ տուժողի իրավահաջորդ:

«Բացի այդ, ապրիլի 26-ին ՀՀ գլխավոր դատախազությունում ստացվել է նաև առանձին պահանջ՝ 2020թ. արցախյան պատերազմի աղետալի հետևանքներին հանգեցրած պատճառների հանգամանքների վերաբերյալ ՀՀ հակակոռուպցիոն կոմիտեում միացված վարույթով քննվող վերոնշյալ քրեական գործով ՀՀ վարչապետ Նիկոլ Փաշինյանին ՀՀ քրեական օրենսգրքի 299-րդ հոդվածի 1-ին մասով, 308-րդ հոդվածի 2-րդ մասով և 309-րդ հոդվածի 3-րդ մասով որպես մեղադրյալ ներգրավելուվերաբերյալ:

Հսկող դատախազի կողմից այս միջնորդությունն ուղարկվել է վերը նշված նույն գործով վարույթն իրականացնող քննիչին՝ ՀՀ քրեական դատավարության օրենսգրքի 102-րդ և 199-րդ հոդվածներով սահմանված կարգով քննարկելու նպատակով»,-մանրամասնում են ՀՀ գլխավոր դատախազությունից՝ ընդգծելով՝ բոլոր միջոցները գործադրելու են՝ մասնավորապես 2020թ. աղետալի պատերազմին առնչվող քրեական գործերով դատավարության բոլոր մասնակիցների, այդ թվում նաև տուժողների և տուժողների իրավահաջորդների դատավարական իրավունքների լիարժեք իրացումը երաշխավորելու նպատակով, ինչի շրջանակներում մշտապես բաց է արդյունավետ հաղորդակցության համար:

Միաժամանակ, հիշեցվում է՝ քրեական գործերի քննությունը, դրա օրինականության նկատմամբ դատախազական հսկողությունը, այդ շրջանակներում կայացվող դատավարական որոշումները կատարվում են բացառապես օրենքով սահմանված կարգով և չեն կարող կախված լինել հանրային գործընթացներից: Անթույլատրելի է համարվում նաև իրավական դաշտից դուրս գտնվող ցանկացած գործոնով պայմանավորված՝ քննությունների ընթացի վրա ազդեցություն գործադրելու հրապարակային կոչերը: Դրանք, նշվում է, չեն բխում իրավական պետության սահմանադրական հիմունքներից և քրեական արդարադատության շահերից:

Հիշեցնենք՝ երեկ՝ ապրիլի 26-ին, 2020 թվականի 44-օրյա պատերազմում զոհված զինծառայողների հարազատները Երևանի Շառլ Ազնավուրի հրապարակում, հանդես գալով ելույթներով, հայտարարեցին, որ իրենց մինչ այս ունեցած վիշտը և ցասումը իրավական ուղով են տանելու։ Նրանց համոզմամբ՝ իրենց զավակները զոհվել են պետական դավաճանության հետևանքով, և, հետևաբար, իրենք միջնորդություններ են ներկայացնելու ՀՀ գլխավոր դատախազություն՝ իրենց տուժողի կարգավիճակ տալու նպատակով։

Հավաքվածները, որոնք երթով գնացին ՀՀ գլխավոր դատախազություն, ոչ միայն այդ միջնորդությունները հանձնեցին, այլև պահանջ ներկայացրին քննվող քրեական գործով ՀՀ վարչապետ Նիկոլ Փաշինյանին ներգրավել որպես մեղադրյալ ՀՀ Քրեական օրենսգրքի 299-րդ հոդվածի 1-ին մասով, 308-րդ հոդվածի 2-րդ մասով, 309-րդ հոդվածի 3-րդ մասով։