Онлайн
«Պաշտպանելով Արցախը՝ պաշտպանենք Հայաստանը» խորագրով Երևանի Ազատության հրապարակում Ազգային ժողովի ընդդիմադիր «Հայաստան» և «Պատիվ ունեմ» խմբակցությունների հրավիրած հանրահավաքը եզրափակվեց «նախազգուշական» գործողությամբ. հավաքի մասնակիցները փակելով Օպերայի հարևանությամբ գտնվող «Ֆրանսիայի հրապարակ»-ի մուտքերը՝ այնտեղ կանգնեցրին Արցախի դրոշը:
Ինչպես իր ելույթում նշեց խորհրդարանի փոխխոսնակ, «Հայաստան» խմբակցության պատգամավոր, ՀՅԴ ԳՄ ներկայացուցիչ Իշխան Սաղաթելյանը՝
«Սա կլինի մեր առաջին նախազգուշական գործողությունը: Ամենկարևորը, մենք այսօր միասին «Ֆրանսիայի հրապարակ»-ի մեջտեղում կզետեղենք Արցախի դրոշը: Սա իր մեջ ունի խորհուրդ: Սա մեր պայքարի սկիզբն է: Մենք պայքարում ենք հանուն Արցախի դրոշի, հանուն եռագույնի, հանուն մեր միասնության և վաղվա հաղթանակի»:
Արցախի դրոշի տեղադրումից հետո մասնակիցները հնչեցրին «Երազ իմ երկիր հայրենի» երգը:
Հանրահավաքի ողջ ընթացքը՝ տեսանյութում:
Հիշեցնենք՝ ընդդիմադիրները հայտարարեցին, որ այսօրվա հանրահավաքի նպատակներից մեկը տիրող իրավիճակի առնչությամբ «զանգ խփելն է», «մարդկանց թմբիրից արթնացնելը:
Մասնակիցները ընդունել են նաև հանրահավաքի բանաձևը սահմանող հայտարարություն՝ ընդգծելով, որ վճռականորեն մերժում են թուրք-ադրբեջանական տանդեմի կողմից պարտադրվող օրակարգերը, բացառում են Արցախի որևէ կարգավիճակ Ադրբեջանի կազմում:
