Онлайн
Նախատեսվում է ԱՊՀ մասնակից պետությունների զինված ուժերի (ԶՈւ) միջև համագործակցության զարգացման նպատակներով ստեղծել պետությունների զինված ուժերի կապի միացյալ համակարգ:
Այդ մասին այսօր, Ազգային ժողովի (ԱԺ) պաշտպանության և անվտանգության հարցերի մշտական հանձնաժողովում «Անկախ պետությունների համագործակցության մասնակից պետությունների զինված ուժերի կապի համատեղ (միավորված) համակարգի մասին» համաձայնագիրը քննարկելիս ասել է պաշտպանության փոխնախարար Արման Սարգսյանը՝ նշելով, որ արդեն իսկ որոշակի աշխատանքներ տարվել են ՀՀ ԶՈւ կապի ծառայությունն ժամանակակից տեխնիկայով համալրելու և այն անխոցելի դարձնելու ուղղությամբ:
«ԱՊՀ անդամների միջև ստորագրվող համաձայնագիրը նախատեսում է մի դրույթ, ըստ որի Ռուսաստանի Դաշնությունում (ՌԴ) ստեղծվելու է կապի կառավարման կենտրոն՝ բաժնի կարգավիճակով, և յուրաքանչյուր պետություն ուղիղ աշխատելու է միայն ՌԴ-ի հետ։
Փոխնախարարի վստահեցմամբ՝ տարածաշրջանում ոչ մի այլ պետություն հասանելիություն չի ունենալու Հայաստանի կապին, բացի ՌԴ-ից, իսկ Ադրբեջանը չի միացել համաձայնագրին:
Արման Սարգսյանի փոխանցմամբ՝ Հայաստանի Հանրապետությունը (ՀՀ) վերապահումով է միանում համաձայնագրին, որը նաև հնարավորություն է տալիս նախապես իրազեկման պարագայում՝ 6-ամսյա ժամկետում դուրս գալ համաձայնագրից, որը սակայն կնախատեսի նախկին տրամադրված ֆինանսական միջոցների հետ վերադարձի պարտավորություններ:
Նշենք՝ քննարկվող համաձայնագրի հիմնավորման մեջ ասվում է.
«Համաձայնագրով նախատեսվում է ԱՊՀ մասնակից պետությունների զինված ուժերի միջև համագործակցության զարգացման նպատակներով Կողմերի կողմից ստեղծել ԱՊՀ մասնակից պետությունների զինված ուժերի կապի համատեղ (միացյալ) համակարգ:
Դիտարկվող Համաձայնագրի իրագործման գործունեության լիազորված մարմիններ են համարվում ԱՊՀ մասնակից պետությունների պաշտպանության նախարարությունները (պաշտպանական գերատեսչությունները):
Համաձայնագրի դրույթներին համապատասխան կապի համատեղ (միացյալ) համակարգի գործառնության և զարգացման ապահովման շահերի հետ կապված ծառայությունների մատուցումը և աշխատանքների կատարումը, կապի ռազմական տեխնիկայի (գույքի) մատակարարումը, կապի ռազմական տեխնիկայի նորոգումն իրականացվում են Կողմերի երկկողմ միջազգային պայմանագրերի համաձայն:
Կապի համատեղ (միացյալ) համակարգի զորքերի (ուժերի) համար զինվորական մասնագետների ուսուցումն իրականացվում է Կողմերի երկկողմ համաձայնագրերով:
Կողմերն իրականացնում են կապի համատեղ (միացյալ) համակարգի ազգային համակարգի (սեգմենտի) զարգացման ֆինանսավորումը և Կապի համատեղ (միացյալ) համակարգի համատեղ միջոցառումների ապահովումը:
Կապի համատեղ (միացյալ) համակարգի զարգացման և դրա մարմինների գործունեության ֆինանսավորման կարգը սահմանում է ԱՊՀ կառավարության ղեկավարների խորհուրդը»:
ՀՀ պաշտպանության փոխնախարարի վստահեցմամբ՝ համագործակցությունը մեր կապի համակարգը կդարձնի ավելի պաշտպանված և ժամանակակից
Հանձնաժողովը համաձայնագրին դրական եզրակացություն է տվել:
Քննարկման մանրամասները՝ տեսանյութում։
