Միրզոյանը հանդիպումներ է ունեցել ՌԴ-ի, Ֆրանսիայի ու ԱՄՆ-ի դեսպանների հետ, քննարկել Ղարաբաղում ստեղծված վիճակը

Հայաստանի արտաքին գործերի (ԱԳ) նախարար Արարատ Միրզոյանը հանդիպումներ է ունեցել ՀՀ-ում Ռուսաստանի, ԱՄՆ-ի և Ֆրանսիայի դեսպանների հետ, քննարկել է Լեռնային Ղարաբաղում ստեղծված իրավիճակը։

Հայաստանի արտաքին քաղաքական գերատեսչության փոխանցմամբ՝ Ռուսաստանի Դաշնության (ՌԴ) դեսպան Սերգեյ Կոպիրկինի հետ հանդիպմանը Միրզոյանը կարևորել է Ադրբեջանի ներխուժմանը ՌԴ համապատասխան գերատեսչությունների տված գնահատականը: Նախարարն ընդգծել է ՌԴ խաղաղապահ զորախմբի կողմից կոնկրետ միջոցների ձեռնարկումը ադրբեջանական ստորաբաժանումների ներխուժումը խաղաղապահների պատասխանատվության գոտի դադարեցնելու և Ադրբեջանի զինված ուժերը դուրս բերելու համար:

Հայաստանում Ֆրանսիայի և ԱՄՆ դեսպանների հետ հանդիպումներում էլ նախարար Միրզոյանն անթույլատրելի է համարել Ադրբեջանի կողմից Լեռնային Ղարաբաղի խաղաղ բնակչության դեմ շարունակական սադրանքներն և ագրեսիվ գործողությունները:

ԱԳ նախարարը և դեսպանները հանդիպումներում անդրադարձ են նաև Արցախի կենսական նշանակության ենթակառուցվածքների բնականոն աշխատանքը դիտավորյալ խափանելու հետևանքով ստեղծված իրավիճակին։

Նախարար Միրզոյանը կարևորել է ստեղծված իրավիճակի վերաբերյալ միջազգային հանրության պատշաճ և հասցեական արձագանքն՝ ուղղված Լեռնային Ղարաբաղի տարածքից ադրբեջանական զինուժի դուրսբերմանը և իրավիճակի դեէսկալացիային։