Ադրբեջանի զինուժը տիրացել է զավթած Փառուխ համայնքի մոտակայքում գտնվող բարձունքին․ Արցախի գլխավոր դատախազությունը քրգործ է հարուցել

Արցախի Հանրապետության (ԱՀ) գլխավոր դատախազությունը հայտնում է, որ հարուցվել է քրեական գործ՝ Արցախի տարածքային ամբողջականությունը խախտելուն ուղղված գործողությունների առնչությամբ։

«24.03.2022թ., ժամը 16:00-ի սահմաններում, Ադրբեջանի զինված ուժերի մի խումբ ծառայողներ ապօրինի մուտք են գործել ԼՂՀ վարչատարածքային բաժանման մասին օրենքի համաձայն Արցախի Հանրապետության տարածքային ամբողջականության մաս կազմող Ասկերանի շրջանի՝ ռուսական խաղաղապահ ուժերի պատասխանատվության գոտում տեղակայված Փառուխ համայնք, զենքի կիրառմամբ ու կիրառման սպառնալիքի գործադրմամբ զավթել այն և տիրացել դրա մոտակայքում գտնվող բարձունքին, այդպիսով խախտելով Արցախի Հանրապետության տարածքային ամբողջականությունը:

Նկարագրված դեպքի առթիվ ԱՀ գլխավոր դատախազությունում հարուցվել է քրեական գործ ԱՀ քրեական օրենսգրքի 313-րդ հոդվածով (Տարածքային ամբողջականությունը խախտելուն ուղղված գործողությունները) նախատեսված հանցանքի հատկանիշներով և նախաքննության կատարման համար ուղարկվել ԱՀ քննչական կոմիտե»,-ասված է տարածած հաղորդագրությունում: