Արցախում հակառակորդը գիշերն ԱԹՍ է կիրառել, հայկական կողմը 1 վիրավոր ունի․ Արցախի ՊՆ - RadioVan.fm

Онлайн

Արցախում հակառակորդը գիշերն ԱԹՍ է կիրառել, հայկական կողմը 1 վիրավոր ունի․ Արցախի ՊՆ

2022-03-25 10:15 , Общество, 1296

Արցախում հակառակորդը գիշերն ԱԹՍ է կիրառել, հայկական կողմը 1 վիրավոր ունի․ Արցախի ՊՆ

Ադրբեջանը վերահսկողության տակ է վերցրել Արցախի Ասկերանի շրջանի Փառուխ գյուղն ու հարակից դիրքերը։

Այդ մասին հայտնում է Արցախի Հանրապետության պաշտպանության նախարարությունը (ԱՀ ՊՆ)։

Հիշեցնենք՝ երեկ երեկոյան հայտնի դարձավ, որ Ադրբեջանի զինուժը, կոպտորեն խախտելով 2020թ. նոյեմբերի 10-ի եռակողմ հայտարարության պահանջները, Փառուխ գյուղի ուղղությամբ խախտել է շփման գիծը, ներխուժել Արցախի Հանրապետությունում Ռուսաստանի Դաշնության խաղաղապահ զորակազմի պատասխանատվության գոտի։

Վերահսկողության տակ վերցնելով Փառուխ գյուղն ու հարակից դիրքերը՝ հակառակորդը փորձել է առաջխաղացում ապահովել Արցախի Հանրապետության արևելյան սահմանագոտում։ Արցախի տեղեկատվական շտաբը հայտնել էր, որ խաղաղապահները գտնվում են իրենց հենակետերում, և բանակցությունները շարունակվում են:

Սակայն, ըստ Արցախի պաշտպանության նախարարության (ՊՆ) այսօր տարածած հաղորդագրության, ռուսական խաղաղապահ զորակազմի և Արցախի համապատասխան մարմինների կողմից ժամեր տևած բանակցությունները էական արդյունքներ չեն տվել, և հակառակորդը չի վերադարձել ելման դիրքեր:

Ավելին. ադրբեջանական ստորաբաժանումները մարտի 25-ի գիշերը կրակ են բացել Պաշտպանության բանակի (ՊԲ) ստորաբաժանումների վրա՝ կիրառելով ինչպես տարբեր տրամաչափի հրաձգային զինատեսակներ, այնպես էլ հարվածային անօդաչու թռչող սարք (ԱԹՍ):

«Ծավալված փոխհրաձգության արդյունքում հակառակորդի կողմից զոհվել է առնվազն 5 զինծառայող: Հայկական կողմից կա մեկ վիրավոր։ Ժամը 09։00 դրությամբ իրադրությունը հարաբերականորեն կայուն է։ Ակնկալում ենք, որ ռուս խաղաղապահները միջոցներ կձեռնարկեն ադրբեջանական ստորաբաժանումներին ելման դիրքեր վերադարձնելու ուղղությամբ»,-ասված է Արցախի ՊՆ-ի տարածած հաղորդագրությունում։

Лента

Рекомендуем посмотреть